Демократскиот сојуз предлага на велешанецот Спасе посмртно да му се додели орден

Демократскиот сојуз му изразува искрено сочувство на семејството на велешанецот Спасе Димовски, кој исчезна во водите на надојдениот поток кај велешкото село Белештевица на трети август, наведено е во партиското соопштение.

„Димовски го загуби животот помагајќи им на екипи на ЕВН да се извлечат од калта предизвикана од надојдените води. И покрај масовната потрага, неговото тело беше пронајдено во водите на Вардар, дури три недели подоцна. Изразувајќи безрезервна почит кон неговиот херојски чин на саможртва во спасувањето луѓе во неволја, Демократскиот сојуз му предлага на претседателот на државата, Стево Пендаровски, на Спасе Димовски посмртно да му го додели орденот ‘8 Септември‘, а Владата и ЕВН финансиски да го помогнат неговото семејство. Вечна му слава на херојот“, се вели во соопштението.