Вучиќ: Го ценам пријателството меѓу Србија, Албанија и Северна Македонија
Тој наведе дека политичката борба за младите и за генерациите што доаѓаат е најважна и дека таа може да се постигне само ако сите заедно соработуваат.
Српскиот претседател Александар Вучиќ обраќајќи се на онлајн панел-дискусијата „Економски форум на Делфи“ за пристапувањето на Западен Балкан во ЕУ, изјави дека во голема мерка го цени пријателството на трите држави, Србија, Албанија и Северна Македонија, кои се на патот кон ЕУ и дека многу ја цени тешката, посветена работа на комесарот за проширување Оливер Вархеји.
Како што јави допсиникот на МИА од Белград, тој потсети дека Србија, Северна Македонија и Албанија ја започнале иницијативата „Мал Шенген“ со цел да се овозможи слободен проток на луѓе, стоки и додаде дека е благодарен на ЕУ, која се залага за истите вредности.
– Гледаме дека треба да соработуваме не само за прашањето на економските односи, туку исто така сакаме да ги подобриме нашите односи кои имаат врска со инфраструктурата и поврзаноста – кажа Вучиќ.
Тој наведе дека политичката борба за младите и за генерациите што доаѓаат е најважна и дека таа може да се постигне само ако сите заедно соработуваат.
– Кога ќе кажам заедно, мислам на ЕУ и сите земји во регионот, кажа Вучиќ – додавајќи дека не постои одржлива иднина за народите, доколку младите немаат шанса да комуницираат со своите први соседи.
Тој посочи дека земјите во регионот треба да ја оживеат и да ја обноват довербата меѓу себе и додаде дека е горд што не може да се најдат луѓе кои говорат нешто лошо за Северна Македонија, но и за Албанија.
-Горд сум на тоа и тоа е резултат на нашата заедничка работа во претходните години, кажа Вучиќ. Тој посочи дека има простор за натамошно подобрување на односите меѓу државите, со заедничка работа во економскиот сектор, но и на политичката агенда.
-Сакам владите од сите три земји да градат мостови на доверба и верба, а луѓето од нашиот регион тоа ќе знаат да го ценат, оцени Вучиќ.
На панелот за пристапување на Западен Балкан во ЕУ, каде говореа и еврокомесарот за проширување Оливер Вархеји, албанскиот премиер Еди Рама и поранешниот премиер на Северна Македонија Зоран Заев, Вучиќ оцени дека Србија прави максимални напори на реформскиот пат во европските интеграции, во областа на владеењето на правото, реформите во економскиот сектор и во поддршката за слободни медиуми.