30 ДЕНА ПРИТВОР ЗА РУСТЕМИ И ЗА УПРАВИТЕЛОТ НА КОМУНАЛНА Обвинителството ги товари за загрозување на здравјето на скопјани

Основниот кривичен суд Скопје им одреди притвор од 30 дена на директорот на Јавното претпријатие „Комунална хигиена“, Сабахудин Рустеми, и на управителот за отпад во претпријатието, поради сомневање дека сториле кривично дело „Загрозување на животната средина и природата со отпад“, предвидено во член 230 став 1 од Кривичниот законик.

Од Судот информираа дека мерката притвор е определена „поради опасност од попречување на истрагата, влијание врз сведоци и можност за повторување на делото“.

„Согласно решението на судот, за осомничените С. Р. и А. С., вработени во ЈП ‘Комунална хигиена‘, мерката притвор е определена заради постоење на основите од член 165 став 1, точки 2 и 3“, соопштија од Кривичниот суд.

Обвинителството појасни дека двајцата осомничени постапувале спротивно на Законот за управување со отпад и на својата основна дејност — редовно собирање и транспортирање на безопасен отпад на подрачјето на Град Скопје.

„Со пропуштање на целосен надзор над собирањето и транспортирањето на комуналниот отпад, како и со непрописно управување со отпадот, тие овозможиле да се создадат мали депонии на јавни и сообраќајни површини, со што го загрозиле квалитетот на почвата, воздухот и водата и го довеле во опасност животот и здравјето на граѓаните“, наведуваат од Јавното обвинителство.

Од таму додаваат дека сомневањата биле потврдени со вонредни инспекциски надзори спроведени од локалните инспектори за животна средина, како и со експертско мислење на Институтот за јавно здравје за влијанието на отпадот врз јавното здравје и можноста за ширење заразни заболувања.

Против решението за притвор странките имаат право на жалба пред Кривичниот совет на Судот.