ИРАН ПЛАНИРАЛ НАПАД СО ДРОНОВИ ВРЗ ТРАМП И НЕГОВИТЕ СОРАБОТНИЦИ? Израел му доставил разузнавачки информации на Вашингтон

Израел му доставил на Вашингтон разузнавачки информации за наводните планови на Иран за напади врз американскиот претседател Доналд Трамп и високи функционери од неговата администрација со беспилотни летала натоварени со експлозив, објави весникот „Израел Хајом“, повикувајќи се на неименувани високи израелски и американски претставници.

Според весникот, Мосад ги доставил информациите до американската Централна разузнавачка агенција (ЦИА), откако американските разузнавачки служби побарале од Израел да ги провери и потврди добиените сознанија. Наводите, според истите извори, ги потврдила и друга западна разузнавачка служба.

Информациите укажувале на можни напади со дронови опремени со експлозив, насочени кон Трамп и членови на неговата администрација. Не се објавени детали за тоа кога и каде наводно требало да бидат извршени нападите, ниту кој би бил непосредно задолжен за нивното спроведување.

Според извештаите што ги пренесуваат повеќе медиуми, американските власти по добивањето на предупредувањето презеле дополнителни безбедносни мерки. Наводно, министерот за финансии Скот Бесент бил преместен од својот дом во населбата Џорџтаун во Вашингтон во безбедна воена база. Слични мерки биле преземени и за државниот секретар Марко Рубио и министерот за одбрана Пит Хегсет.

Безбедносните мерки наводно вклучувале и намалување на јавните настапи на Трамп, особено на настаните на отворено, како и засилена заштита со системи за откривање и неутрализирање беспилотни летала.

Израелскиот весник наведува дека предупредувањето за наводниот ирански план дополнително ги намалило изгледите за постигнување договор меѓу Вашингтон и Техеран, дури и за почетна рамка за понатамошни преговори.

Во меѓувреме, директорот на Мосад, Роман Гофман, на 13 ноември престојувал во Вашингтон, каде што се сретнал со директорот на ЦИА, Џон Ретклиф. Според американскиот портал „Аксиос“, кој се повикува на три извори запознаени со посетата, Гофман требало да отпатува и во Мајами на средба со специјалниот пратеник на Трамп, Стив Виткоф.

Посетата се случува во период кога израелскиот премиер Бенјамин Нетанјаху го притиска Трамп повторно да ја започне воената операција против Иран. Според „Аксиос“, американскиот претседател засега се спротивставува на барањата за продолжување на воените дејства и се определува за продолжување на поморската блокада и економскиот притисок врз Техеран, оставајќи простор за евентуален договор.

Дополнителен контекст за загриженоста на американските разузнавачки служби дава и меморандумот од 23 октомври, испратен од директорот на националното разузнавање Џеј Клејтон до државниот секретар Марко Рубио. Во документот, кој подоцна беше објавен како декласифициран, Клејтон предупредува дека Иран значително ги засилил напорите за таргетирање американски државјани и владини функционери на Блискиот Исток и во други земји.

Во меморандумот се наведува дека американските разузнавачки служби добиле информации за заговори за ликвидација на американски државјани, кои достигнале напредна фаза. Клејтон побарал информациите да им бидат достапни на поширок круг американски функционери за да можат да преземат соодветни безбедносни мерки.

Меморандумот, сепак, не ги наведува Трамп или други конкретни функционери како потенцијални цели, ниту споменува планови за напади со беспилотни летала.

Иранските власти досега јавно не ги коментирале најновите наводи, а Белата куќа, ЦИА и американската Тајна служба немаат објавено официјална потврда за конкретна опасност за напад врз Трамп и неговите соработници.