ЗНАЕТЕ КОЈ МИ КАЖА? ПУТИН. И МНОГУ БЕВ ЛУТ! Коментар на Трамп за наводниот украински напад на руската претседателска резиденција

Претседателот на САД Доналд Трамп изјави дека рускиот претседател Владимир Путин му кажал дека Украина наводно нападнала една од неговите резиденции со беспилотни летала, велејќи дека таквиот потег „не е добар“, иако Киев веднаш ги отфрли тврдењата.

– Не ми се допаѓа. Тоа не е добро – рече Трамп, додавајќи: „Слушнав за тоа утрово. Дали знаете кој ми го кажа тоа? Претседателот Путин. Тој ми кажа рано утрово дека бил нападнат. Тоа не е добро. Тоа не е добро. Не ги заборавајте Томахавците, јас ги запрев, не го сакав тоа. Едно е да се биде офанзивен, бидејќи и тие (Русите) беа офанзивни. Но, друго е да се нападне неговата куќа. Не е вистинско време за ништо од тоа. Денес дознав за тоа од претседателот Путин и бев многу лут.“

Тој додаде дека е можно обвинувањата да се лажни и дека нападот воопшто не се случил, но истакна: „Но, претседателот Путин ми кажа утрово дека се случило.“

Ова се првите изјави на Трамп за случајот откако рускиот министер за надворешни работи Сергеј Лавров јавно упати обвинувања против Украина.

– Всушност, штотуку слушнав за тоа, но не знам ништо за тоа. Тоа би било многу лошо. Тоа не би било добро – изјави Трамп пред новинарите пред средбата со израелскиот премиер Бенјамин Нетанјаху во неговото одморалиште Мар-а-Лаго во Флорида.

Трамп го опиша телефонскиот разговор со Путин како „продуктивен“, но додаде дека сè уште има отворени прашања за постигнување мировен договор за Украина.