Зградата што падна во Мајами тонела 2 милиметра годишно, дали поради тоа се урнала?

Што го предизвика колапсот на зградата во Мајами? Ова прашање ги измачува инженерите, локалните власти и граѓаните на Флорида кои се во исчекување на пронаоѓање на преживеани под урнатините од 12-катната зграда која колабираше во четвртокот, пишува БиБиСи.

Досега недостасуваат 159 лица, а четворица починаа. Не се знае колку точно луѓе имало во зградата кога паднала. Гувернерот на Флорида, Рон ДеСантис рече дека сега се фокусирани на пронаоѓање на преживеаните, а потоа ќе се бараат одговори дали причината е нешто што е поврзано само со зградата или проблемот е поголем.

Зградата што се урна во четвртокот имаше 12 ката и 55 станови. Очевидците го споредуваат колапсот со сцените од 11 септември 2001 година.

– Звучеше како гром. Со сопругата истрчавме на балконот, изгледаше како да експлодирала бомба. Кога ја отворивме вратата веќе немаше зграда, само куп урнатини – вели Бари Коен за БиБиСи.

Роднините сѐ уште се надеваат дека има преживеани под урнатините иако властите почнаа да собираат примероци од ДНК.

Тимови од Мексиско и од Израел помагаат при пронаоѓањето на преживеаните. По потрагата по преживеаните ќе почне целосна истрага за несреќата.

Но, во каква состојба била зградата? Зградата е изградена во 1980 година и била подложена на редовна 40-годишна ревизија. Зградата била во процес на добивање ресертификација и имала потреба од обнова, велат властите.

Инженерите откриле рѓосан челик и оштетен бетон кои требало да се поправат, но не виделе ништо што би сугерирало дека зградата ќе колабира. Студија објавена лани од истражувачи од Меѓународниот универзитет во Флорида покажала дека зградата тонела 2 милиметра годишно во 90-тите години што би можело да влијае врз нејзината структура.

Зградата е изградена врз пресушено мочуриште, за што експертите велат дека секогаш е загрижувачко зашто земјата со тек на време може да се збие и да доведе до промени.

БиБиСи пишува дека во 2018 година инспекцијата утврдила крупна грешка во оригиналниот дизајн на блокот што се урна. Овој извештај кој сега градот Сурфсајд го објави јавно, покажува дека грешката ја спречувала дренажата на водата во основата на кулата Чемплејн со поглед кон океанот.

Градежниот инженер Френк Морабито во тој извештај предупредил дека има докази за големи структурни оштетувања на бетонската плоча под базенот и пукнатини во подземната гаража на зградата во Сурсфајд.