ЗЕЛЕНИТЕ КРЕДИТИ ПОРАСНАЛЕ ЗА 22,7 МИЛИОНИ ЕВРА ГОДИНАВА Нивниот удел во вкупните кредити е занемарлив

Зелените кредити бележат постојан раст во портфолијата на банките и во третиот квартал од годинава растот на зелените кредити, во однос на истиот период лани, изнесува 1,4 милијарди денари (22,7 милиони евра) или 7,4%, информира Народна банка.

-Уделот на зелените во вкупните кредити сѐ уште е на релативно ниско ниво, но од крајот на 2019 година, заклучно со третото тримесечје од 2024 година, се забележува промена од 2,2 % на 4,4 % – изјави гувернерката Ангеловска-Бежоска на средбата со Амра Омерагиќ и Славен Поповиќ, претставници на „Финансии во движење”, кои се советници на „Инвестицискиот фонд за зелен раст”.

Народната банка, се наведува во соопштението од средбата, навреме ги препозна ризиците од климатските промени и зазеде проактивен став вклучувајќи ги климатските ризици и придонесот кон зелената одржлива економија во своите стратегиски цели. Банката е насочена кон зајакнување на регулаторните, известувачките и супервизорските практики во управувањето со климатските ризици

На средбата беше искажана поддршка за досегашната успешна соработка, а се разговараше и за идните заеднички активности, во чии рамки во Народната банка, под покровителство на „Инвестицискиот фонд за зелен раст”, во соработка со „Финансии во движење”, и експерти од „Ернст и Јанг”, се одржа втората работилница за градење капацитети за ЕСГ, на тема „Управување со влијанието на еколошките, социјалните и управувачките фактори (ЕСГ), ризици и можности”.

На работилницата, велат оттаму,  се потврди значајната улога на централните банки и финансиските супервизори во зајакнувањето на отпорноста на финансискиот систем на климатските ризици, преку поддршка и поттикнување на преминот кон одржлива економија. Во текот на изминатите години, сѐ поголем број централни банки ги вклучија климатските промени како стратегиски приоритет и усвоија стратегии за управување со климатските ризици.

„Инвестицискиот фонд за зелен раст” се залага за управување со климатските промени и за одржлив економски раст, пред сè преку инвестирање во мерки со коишто се намалува потрошувачката на енергија, употребата на ресурси и јаглеродните емисии. Фондот го насочува финансирањето кон деловните претпријатија и домаќинствата преку техничка помош, знаења и техничка експертиза за да се осигури дека инвестициите се успешно спроведени и со високи меѓународни стандарди.

Фондот работи на 19 пазари низ Југоисточна Европа, вклучувајќи ги и Турција, Европскиот источен соседски регион и Блискиот Исток и Северна Африка.