ЗАПЛЕНЕТА ДРОГА ВРЕДНА 200.000 ЕВРА, ШЕСТМИНА УАПСЕНИ Пресечен меѓународен нарко-канал од Албанија кон Грција (ФОТО+ВИДЕО)

Од Министерството за внатрешни работи информираат дека во текот на вчерашниот ден во полициска акција беа лишени од слобода 6 лица и запленети 67,5 кг марихуана, вредна околу 200.000 евра.

Во акцијата биле вклучени полициски службеници од Одделот за криминалистичка полиција – Сектор за недозволена трговија со дрога, оружје и опасни материи, РЦ Југ и Единицата за брзо распоредување во рамки на Одделот за специјални полициски операции.

– Имено, на 12.10.2021 во попладневните часови од страна на полициските службеници во непосредна близина на Граничен премин Богородица, при обид нелегално да пренесат две торби со марихуана во количина од 67,5 кг биле лишени од слобода Л.М. (44) и А.М. (36), двајцата албански државјани. Во рамки на истрагата беа обезбедени докази за инволвираност на уште 4 лица, од кои уште двајца албански државјани и двајца државјани на Република Северна Македонија – се вели во соопштението на МВР.

Од МВР велат дека набрзо потоа, во близина на с. Стојаково лишен е од слобода Т.Х. (38) од Р. Албанија, а по извршен претрес во домот на В.Д. (41) од с. Стојаково, каде бил затекнат и Е.Б. (29) од с. Попчево, струмичко, од слобода биле лишени и овие две лица. Шестиот член на криминалната група А.К.(37), албански државјанин, кој бил во бегство, е лишен од слобода денеска, околу 13.30 часот, на подрачјето на Кичево.

Од страна на МВР во текот на денешниот ден до Основното јавно обвинителство за гонење на организиран криминал и корупција против шесте лица ќе биде поднесена пријава за сторено кривично дело по чл. 215 ст. 3 од Кривичниот законик.