Закупецот да го врати во првобитна состојба градежното земјиште или плажата, ако истекол рокот за закуп

На предлог на Министерството за транспорт и врски, Владата денеска ја дополни Уредбата со законска сила за примена на Законот за градежно земјиште за време на вонредна состојба, со која се задолжува закупецот да го врати во првобитна состојба градежното земјиште кое било предмет на краткотраен закуп предвидено со урбанистички план или урбанистичко-планска документација за плажа, а за кое временскиот рок за краткотраен закуп е истечен или договорот за краткотраен закуп е предвремено раскинат.

Оваа уредба ќе важи до крајот на годината a се однесува и на незаконските стопанственици со плажите во Охрид, кои досега узурпирале 25 локации на охридското крајбрежје. Но проверката нема да ја вршат општинските инспектори, туку Пазарниот инспекторат и Управата за јавни приходи. Тие од нелегалните стопанственици ќе треба да бараат на увид договор за закуп, а доколку го немаат, тогаш, согласно законите, тие ќе бидат казнети, а објектите затворени.

 

Оваа владина Уредба треба да доведе до враќање на сите плажи во целосно владение на Општина Охрид, се додека, физички или правни лица не склучат нов договор за концесија.

Доколку некоја од фирмите, иако нема концесија на плажата, одбие да постапи согласно уредбата и да ја врати во првобитна состојба, тогаш ќе постапи Пазарниот инспекторат.

– Надзорот над вршењето на дејноста во рамки на Градежното земјиште предвидено со урбанистички план или урбанистичко- планска документација за плажа, се врши од страна на Државниот пазарен инспекторат и Управата за јавни приходи, a не постапувањето од страна на закупецот во согласност со член 2-а од оваа уредба, претставува основ Државниот пазарен инспекторат да изврши затворање на објектите – се додава во уредбата.

Владата денеска ја донесе и Уредбата со законска сила за примена на Законот за угостителска дејност за време на вонредна состојба, со која се уредува начинот на работата на Комисија за категоризација на угостителските објекти.