ЗАГРОЗЕНА Е БЕЗБЕДНОСТА НА ЕУ Калас за упадот на руски дронови во Полска

Европската Унија најостро го осудува намерното прекршување на воздушниот простор на нејзина земја членка од страна на руски дронови што се случи на 10 септември, се вели во официјалната писмена изјавата на високата претставничка на ЕУ за надворешни работи и безбедносна политика Каја Калас упатена во име на блокот поради упадот на руски дронови во воздушниот простор на Полска.

– Овој агресивен и неодговорен чин е дел од сериозна ескалација на состојбите од страна на Русија. Тој ја загрозува безбедноста на граѓаните на ЕУ, регионалната стабилност и меѓународниот мир, се додава во изјавата во врска со, како што е наведено, „неиспровоцираното прекршување на воздушниот простор на ЕУ од страна на Русија“.

Според Калас, овој случај само ја зајакнува решеноста на ЕУ да ја поддржува Украина и нејзиниот народ во нивната одбрана од Русија и нивниот стремеж кон сеопфатен, праведен и траен мир.

– Дополнително ќе ја зголемиме цената што треба да ја плати Москва со значително зајакнување на санкциите кон Русија и нејзините поддржувачи. Исто така, ќе работиме со нашите меѓународни партнери за да извршиме притисок врз Русија да ја прекине оваа војна – се нагласува во изјавата.

Калас потенцира и дека упадот на руските дронови над територијата на Полска е најново во низата кршења на суверениот воздушен простор на земјите членки на ЕУ од 2022 година.

– Изразуваме целосна солидарност со Полска и продолжуваме да и ја нудиме поддршката што и е потребна за заштита на нејзината источна граница. Со полските власти сме во постојан близок контакт – се додава во изјавата на Калас.