Заев веќе гласаше во втор круг
Да се најавува оставка од премиерската функција среде кампања и на само 10 дена пред спроведувањето на вториот изборен круг, треба стварно да си Заев.
Човек треба да има камено срце за воопшто да не се потресе и да не почувствува потреба да си истресе половина шишенце валеријана под јазик по емотивното признание на премиерот Зоран Заев дека тој не би можел да продолжи да ја води владата доколку главниот град падне во рацете на опозицијата.
Замисли, го очекуваш претседателот на СДСМ да го искоментира тешкиот пораз што го доживеа неговата партија по само четири години владеење со најголемиот дел од општините ширум земјава, а тој излегува на говорницата со раката ставена на срцето и ти вели дека ја разбрал пораката, но дека животот (секако, политичкиот) би му немал смисла доколку Петре Шилегов не победи во вториот изборен круг и доколку не освои нов мандат во Град Скопје.
И што си велиш? „Дал да се умијем ил да се убијем“?
Кој ли е тој стратег за комуникации во СДСМ кој му подари таков самоуништувачки совет на својот партиски лидер? Секако, голема е веројатноста ова повторно да е резултат на импровизацијата и на брзоплетоста кои му се омилени спортски дисциплини на премиерот, но ако сепак таквата негова изјава следувала по нечиј совет, тогаш стратезите за комуникации од Бихаќка слободно можат да се преселат во Белата палата.
Оти, да се најавува оставка од премиерската функција среде кампања и на само 10 дена пред спроведувањето на вториот изборен круг, треба стварно да си Заев. Оти, да се најавува повлекување од премиерското столче по катастрофален прв изборен круг во кој магично ти исчезнуваат половина гласови од минатите локални избори, стварно треба да си Заев. Оти, да се рече дека Владата не може да оди напред ако Скопје оди назад, а во првиот круг си имал катастрофална излезност и над 60.000 неважечки ливчиња кои пред четири години во најголем дел биле гласови за твојата партија, стварно треба да си Заев.
Не знам дали и колку е свесен премиерот, но судејќи по резултатите на овие и на изборите во 2017 година, народот покажа дека е безмилосен и дека умее да ги казнува манипулаторите, мрзливците, лажговците…
И не знам дали стратезите за комуникации во СДСМ му имаат спомнато на лидерот, ама кандидатот за градоначалник на Град Скопје не само што би можел уште сега да се прости од победата во вториот круг, туку би можел да загуби и половина од гласовите што ги беше освоил во првиот.
Зошто? Затоа што еден брзоплет премиер штотуку на својот разочаран народ му ја покажа својата Ахилова пета.