ВОЗАЧОТ НА „БЕСА ТРАНС“ Е ВИНОВЕН ЗА НЕСРЕЌАТА ВО БУГАРИЈА Автобусот се движел брзо, ама не со брзина над дозволената
Причина за несреќата е губење на контролата на возачот над автобусот. И високата, да речам, несоодветна брзина, која, сепак, не била над дозволената, изјави заменикот на бугарскиот главен обвинител, Борислав Сарафов.
Возачот на автобусот на „Беса транс“ е виновен за несреќата што се случи на автопататот „Струма“ во Бугарија, а во која загинаа 45 лица, истакна денеска Борислав Сарафов, заменик на бугарскиот главен обвинител, по завршувањето на истрагата што ја водеше нашиот источен сосед.
– Причина за несреќата е губење на контролата на возачот над автобусот. И високата, да речам, несоодветна брзина, која, сепак, не била над дозволената – изјави Сарафов, пренесе бугарски Дневник.
Обвинителот вели дека по ова, останува да бидат известени роднините на загинатите, кои имаат право да се запознаат со материјалите од истрагата.
Автобусот на „Беса транс“ удри во оградата на автопатот „Струма“ кај село Боснек во раните утрински часови на 23 ноември. Веднаш по ударот, автобусот се запали, а во стравичната несреќа загинаа 45 патници, додека седум лица преживеаја.