ВО АНИМА МУНДИ ПОТРЕСЕНИ ОД ТРАГЕДИЈАТА Поддржуваат забрана за чување кучиња кои можат да бидат опасни

Здружението за заштита на животните „Анима Мунди“ на својот официјален фејсбук профил изрази сочувство за последното случување каде осум годишно дете беше убиено од кучиња. Од Здружението велат дека би поддржале забрана за увоз, продажба, подарување и размножување, како и чување на секое животно кое има физички предиспозиции да нанесе тешки телесни повреди или да загрози живот.

„Длабоко сме потресени и изразуваме сочувство до семејството на детето кое почина по напад од кучиња. Во оваа трагедија загубата е ненадоместлива, неповратна и утеха нема. Повикани сме од повеќе страни да дадеме изјава, но што и да се рече сега е доцна за ова дете, а секое слободно толкување во однос на оваа несреќа, од која нема назад за нас е непримерно и болно.

Единствено што би сакале да се знае дека како здружение за заштита на животни без дилема и веднаш би поддржале забрана за увоз, продажба, подарување и размножување, како и чување од малолетни лица на секое животно кое има физички предиспозиции да нанесе тешки телесни повреди или да загрози животот на друго битие.

Нагласуваме физички предиспозиции, бидејќи нашите искуства, искуствата на стручната фела, а и статистиките кажуваат дека најголемите, најсилните животни имаат најстабилен карактер, се најмирни, но нивната сила е огромна, па дури и со еден потег би можеле да бидат кобни по човек или животно. Еден потег може да биде фатален.

Поддржуваме и бараме прецизна категоризација, во соработка со стручни и засегнати страни и мораториум на размножување, продажба и увоз на животни кои ќе се категориризаат како такви веднаш. Наши предлози се и мандаторна стерилизација или забрана за размножување на сите кучиња, но за овој тип на животни ги бараме и поддржуваме веднаш“- пишува Анима Мунди во својата објава.