ВНАТРЕШНАТА КОНТРОЛА НЕ ПРОНАЈДЕ ДОКАЗИ ЗА ОБВИНУВАЊАТА НА ОПОЗИЦИЈАТА Од МВР порачаа дека се гарант на слободното изразување
МВР е гарант за слободно изразување на вољата на гласачите на изборите од 2017 до денес и тоа ќе продолжи да биде и понатаму. Апелираме , ВМРО-ДПМНЕ да престане да шири невистини, а граѓаните слободно да ја изразат својата волја во недела на вториот круг од локалните избори, порачаа од министерството.
Од Министерството за внатрешни работи информираат дека не се потврдени обвинувањата од ВМРО-ДПМНЕ, за наводното незаконско организирање на група полицајци, кои малтретирале и им се заканувале на членовите на опозициската партија, по спроведувањето на истрагата од Одделот за внатрешна контрола.
„Одделот за внатрешна контрола, криминалистички истраги и професионални стандарди во МВР ги изврши потребните проверки по наводите изнесени од политичката партија ВМРО-ДПМНЕ за планирано физичко малтретирање од страна на полициски службеници вработени во ОВР Прилеп, при што констатира дека во ПС Прилеп, Помошниот оперативен штаб и Републичкиот оперативен штаб локални избори 2021 нема регистрирано пријава од граѓанин или правен субјект дека во предизборниот период, денот на гласањето или во постизборниот период од страна на полициски службеници при преземање на службени дејства е постапувано незаконски или непрофесионално или на кој било начин е малтретиранo лице при вршење на служба, како што беше изнесено на прес конференција на ВМРО-ДПМНЕ“, се вели во дописот од МВР.
Од МВР соопштија и дека на денот на изборите, 17 октомври, во Прилеп нема испратено возило на технички преглед, ниту пак е изречена санкција за сообраќаен прекршок, што исто така говори дека наведените дејствија, всушност не се случиле.
„МВР е гарант за слободно изразување на вољата на гласачите на изборите од 2017 до денес и тоа ќе продолжи да биде и понатаму. Апелираме , ВМРО-ДПМНЕ да престане да шири невистини, а граѓаните слободно да ја изразат својата волја во недела на вториот круг од локалните избори“, порачаа од министерството.