ВМРО-ДПМНЕ: Сведочењето на Боки покажува дека Заев дебело бил заглавен во милионскиот рекет
Зоран Заев во случајот Рекет ги предупредувал осомничените дека криминалот им е откриен, наведува опозицијата.
Сведочењето на првообвинетиот Бојан Јовановски, покажува дека Зоран Заев дебело бил заглавен во милионскиот рекет, реагира опозициската ВМРО-ДПМНЕ.
„Боки 13 го кажува тоа што подолго време јавноста го посочуваше, дека Зоран Заев знаел за милионскиот рекет, па дури и ги известувал сега осомничените дека криминалот е откриен. Како што посочува Боки 13, на 3 април 2019 година, пред едно интервју во телевизијата 1ТВ, што соодветствува со емисијата Печат на неделата, каде што гостувал Заев, бил известен од тогашниот прв човек во Владата дека се откриени и веќе има оформено случај за рекетот од страна на странски обвинител.
Иако досега не е презентиран никаков записник, според признанието на Заев, случајот е пријавен дури на 22 април, односно три недели откако тој го информирал обвинетиот Бојан Јовановски дека странски служби и обвинители го имале документирано целиот криминал“, се наведува во соопштението на ВМРО-ДПМНЕ.
Така изгледа на дело „Луј Витон“ правдата и отворањето на „трас-трас“ истраги, реагира ВМРО-ДПМНЕ, „прво ги предупредуваш своите соработници па после глумиш загриженост и наводно го пријавуваш случајот кај обвинителка која претходно кај нив нарачувала медиумски прогон“.
„Ова само покажува дека Заев е главата на рекетарскиот октопод, а сѐ понатаму е само обид да се прикријат трагите кои водат до него. Затоа не е пријавен случајот веднаш кога излезе во јавноста. Затоа Бојан Јовановски е предупреден. Затоа беше оставена Катица Јанева на слобода. Затоа исчезнуваа нејзините мобилни телефони, а тој на Јовановски не е вештачен. Затоа Зоран Милески Кичеец е на слобода, а со своја паравојска си местеле избори во Охрид заедно со Заев“, наведува ВМРО-ДПМНЕ и порачува дека одговорност ќе има.