ВМРО-ДПМНЕ: Одлуката на ЕУ ја поздравивме, а на Заев не му честитаме, корупцијата околу него и натаму блеска!

ВМРО-ДПМНЕ уште во текот на вчерашниот ден, а и денеска ја поздрави позитивната одлука на Советот на министри на Европската Унија, но воедно очекуваме час поскоро да се дефинира и датумот на кој што ќе се започнат и преговорите и отворање на поглавјата за пристапување кон Европската Унија и Република Македонија да биде рамноправна членка. Што се однесува на дилемата што ја поставуваат од СДСМ, дали планираме на Зоран Заев да му честитаме, одговорот е краток и јасен, а тоа е – не, затоа што нема зошто.

Ова го изјави Димче Арсовски, портпарол на ВМРО-ДПМНЕ, на денешната конференција за печатот.

– Ова не е негов личен монопол. И второ многу, многу позначајно, не може да му се честита за нешто што е получекор. Ќе му порачаме само да се засукаат ракавите и да се направи прогрес во борбата против криминалот и корупцијата кои понатаму блескаат и доаѓа лично од редовите на неговите функционери. Блеска на негативните листи кои ја рангираат Република Македонија како земја меѓу најкорумпираните и најкриминалните во Европа. Заев има поприоритетна работа пред себе освен тоа да диктира и да прашува кој честитал, а кој не, а тоа е 12 проценти од  заболените со корона се доктори. Тоа значи дека се незаштитени самите доктори кои што се борат против короната, не се заштитени во својата работа и работат, голорако. Самиот признава дека 60 проценти од приходите во буџетот нема да се реализираат. Во истиот тој буџет за кој што до вчера велеше дека е солиден и компактен. Нека ги засука ракавите и нека почне да решава проблеми. Баталете сите таму во СДСМ и Владата ПР, баталето го, посветете се на работа, има поприоритетни работи за реализација. Што се однесува за Европската Унија, по изборите граѓаните можат да бидат сигурни дека ВМРО-ДПМНЕ ќе ја стави Република Македонија на брза трака на реформи и ќе направи прогрес кој ќе биде препознаен од европските партнери – реча Арсовски.