Вело Марковски: Најголема грешка е паролата „седете дома“, секој пациент мора да биде прегледан од лекар

Членот на Извршниот комитет на ВМРО-ДПМНЕ, Д-р Вело Марковски, вечерва во емисијата „Само вистина” на Канал 5 истакна дека владата мора да поднесе одговорност за големиот број на починати од ковид-19 во државата. Тој истакна дека црниот биланс покажува дека Македонија не се справува со пандемијата на ниво, како што тоа го прават другите европски и светски земји.

– Генерално, што е најголемата грешка?! Тоа е паролата „седете дома” на пациентите, јавувајте се по телефон и немојте да одите на лекар. Штедете ги лекарите, немојте по рецепти да одите во аптеки. Значи, маса на луѓе оставивме без да ги види матичен лекар што е нон-сенс. Тука ние имаме проблем. И после кажуваат доцна им доаѓале пациентите. Па, како да доаѓаат кога вие им кажувате да не доаѓаат на лекар. А клиничката слика од пролетта до сега е сменета кај пациентите од ковид-19. Скоро кај сите починати постои бактериска пнеумонија со јасни параметри, со високо CRP, со висока седиментација и пореметени фактори на коагулација. И затоа пациентите треба да ги лекуваме соодветно. Не смее да се пушти пациент да не биде виден, да не биде прегледан. Другиот проблем е раното давање антибиотици. Давање антибиотик за време на вирусна инфекција може да има катастрофални последици. Тоа не е мој став, тоа е став на науката. Се прашувам дали се вклучени најдобрите доктори, најдобриот персонал, не можете вие да одите само со партиски членови во борбата со оваа епидемија – посочи Марковски.

Владата направи карантин кога имаше 10 или 11 проценти исполнети болнички капацитети, продолжи тој, а сега кога се преполнија болничките капацитети, владата воопшто нема идеја што да прави.

– Потрошивме 2 милијарди евра, направивме карантини, вонредни сосотојби без да прогласиме епидемија во време кога бројката на позитивни на корона беше драстично помала. Кој ќе одговара за тоа? Поради сето ова ВМРО-ДПМНЕ бараше и опозицијата да биде вклучена во Комисијата за заразни болести, да даде предлози, мислења, да помогне во овие тешки времиња во борбата со коронавирусот – вели Марковски.

Тој потенцира дека битката со ковид-19 мора да биде натпартиска, односно со стручен медицински кадар.

– Јас ѝ порачав на Владата на чело во битката со ковид-19 да стави инфектолог и Комисијата за заразни болести да биде составена претежно од инфектолози. Во разговор со министерот за здравство Венко Филипче се понудив самиот јас да бидам вклучен на клиниките во борбата со ковид-19, но министерот никогаш не ми се јави. Многу сум разочаран од министерот како човек – рече Марковски.