УБИЛ ЧОВЕК ВО МАЛА РЕЧИЦА, ПА ПОБЕГНАЛ ВО БЕРЛИН Кој е затвореникот кој синоќа им „кидна“ на полицајците?
36-годишниот Беким Мемети првично бил осуден во отсуство, а во 2020 година бил уапсен во Берлин во Германија по што бил екстрадиран во земјава.
Затвореникот Беким Мемети кој синоќа рани затворски полицаец на пат кон болница и избега бил осуден на затворска казна за убиство извршено во 2016 година во тетовска Мала Речица, открива Телма.
Како што објави телевизијата, Мемети првично бил осуден во отсуство, а во 2020 година бил уапсен во Берлин во Германија по што бил екстрадиран во земјава.
Тогаш му била повторена постапката во суд и повторно е осуден на долгогодишна затворска казна.
Во септември 2016 година на улица 188 во Мала Речица имало расправија помеѓу две групи при што едно лице загинало, за што бил обвинет и осуден Мемети, кој сега повторно е во бегство.
МВР тогаш објави детали за убиството со следното соопштение:
„Во пресметката учествувале А.Б. (33) и Б.М. (30) од една страна и Х.М. (37), М. Х. (34) и Х.К. (39) сите од Тетово. Б.М. со огнено оружје почнал да пука кон Х.М., М.Х. и Х.К. Х.М. починал на самото место, а Х.К. и М.Х. добиле прострелни рани. Телото на починатиот е предадено на обдукција. Тетовската полиција презема мерки за пронаоѓање на сторителите и целосно расчистување и документирање на случајот, по што ќе биде поднесена соодветна пријава“, наведено е во тогашниот полициски билтен.
Бегалецот Мемети беше најден во Германија, а синоќа во чудни околности успеа да избега од комбе на затворската полиција на пат кон болница.
Според пријавата, Мемети успеал да го земе пиштолот од возачот на комбето покрај уште тројца затворски полицајци, да го рани затворскиот чувар со неговото службено оружје и да избега со автомобил кој бил во близина на местото на инцидентот.
Министерството за правда утрово соопшти детали за инцидентот, а исто така потенцираше дека за бегалецот ќе биде распишана централна потерница.
„На ден 12.01.2023 година, околу 23:20 часот при спровод на осуденото лице Б.М (36) од КПУ Идризово во Ургентниот центар ‘Мајка Тереза’ поради повреда на десната рака, на автопатот кон Скопје кај бензиската пумпа на Лукоил, службеното возило било пресретнато од возило марка ‘ауди’ со сива боја без регистерски таблички кое им го блокирало патот. Осуденото лице во тој момент му го одзело службениот пиштол од футрола на затворскиот полицаец И.Х кој го возел комбето, пукал во него и го повредил во долниот дел на стомакот. Поради повредата, возачот го запрел возилото, а осуденото лице се дало во бегство со патничкото возило ‘ауди’. Вработените во затворската полиција го пријавиле случајот во СВР Скопје. Повредениот затворски полицаец е префрлен во болница на натамошно лекување, а со учесниците на настанот извршени се разговори од страна на надлежните на МВР. Издадена е наредба за распишување на централна потерница. Управата за извршување на санкции ќе направи вонреден надзор во КПУ Идризово и за сите утврдени неправилности ќе преземе соодветни мерки со цел да се утврди зошто не била обезбедена полициска асистенција за спровод до болница. Воедно, ќе се утврдува дали постои одговорност за организацијата на спроведувањето на осуденикот како и за пропустите кои довеле до ваква разврска на целиот настан“, соопшти Министерството за правда.
Осуденото лице Б.М од Тетово бил осуден на вкупна казна од 21 година затвор , од кои 19 за убиство и 2 за неовластено производство и пуштање во промет на наркотични дроги, психотропни супстанции и прекурсори.Казната ја издржува од 28.12.2020 година а истекува на 17.04.2040 година.
СПЕКТАКУЛАРНО БЕГСТВО НА ЗАТВОРЕНИК ВО ИДРИЗОВО Ранет еден припадник на затворската полиција