Турското крајбрежје нова дестинација за купување станови: Потребен е пасош и добар агент, а процедурата е лесна

Нашите сограѓани и гастарбајтери  откако купија станови на брегот на Јадранско и Егејско Море, сега се во потрага по станови  во туристичките градови во Турција. Најинтересни засега се недвижнините во Анталија. Регионалната агенција за недвижнини во Турција преку која се реализира купувањето вели дека целата постапка не е толку комплицирана, а дополнителна предност при купувањето е што агентите честопати не наплатуваат провизија затоа што е на страната на инвеститорите, односно градежните компании. И цените не се високи.

На брегот на Турција се нудат најразлични објекти, но Аланија, туристички град на медитеранскиот брег, е убедлива на прво место според продажбата. Купувачи се и наши граѓани, но уште повеќе нашинци кои живеат и работат во Австрија, Германија, Америка, Канада …

– За околу 55.000 евра, можете да најдете комплетно наместен стан во близина на морето. За станови со две или повеќе соби, потребно е да се издвојат 70.000 евра и повеќе. Куќите и вилите, во зависност од тоа дали се нови или користени, се движат од 120 000 евра до половина милион и повеќе – вели генералната директорка на регионалната агенција за недвижнини во Турција, Нана Каравелиќ за српски Блиц.

Многу пониски се цените во Мерсин. Овој град  е пазар кој сè уште се развива. Таму  може да се купи стан со една спална соба, дневна соба, бања и балкон до 30 000 евра близу морето

Според законот од 2012 година, на граѓаните од над 120 земји им е дозволено да купуваат недвижнини во Турција и потребен е само пасош за да се започне.

– Нашите клиенти доаѓаат од сите земји на поранешна Југославија, односно ги покриваме сите наши говорни подрачја, и целата дијаспора од овие земји. Интересот на нашите луѓе од дијаспората, како и од Србија, Хрватска, Босна и Херцеговина, Црна Гора и Македонија е неверојатен. Во последно време имаме голем број наши луѓе од Америка и Канада. Имаме и успешни случаи на добивање државјанство на Република Турција од клиенти во рамките на програмата „државјанство за инвестиции“, – вели Каравелиќ.

Според неа, најважно е заинтересираниот купувач да го избере имотот. Агенциите од регионот генерално нудат „патувања за инспекција“, што значи дека потенцијалните купувачи доаѓаат максимум една недела и ги разгледуваат недвижнините  за кои се заинтересирани со агент од областа.

Во случај купувачот да го избере имотот и да се случи купувањето, сите патни трошоци се на товар на агенцијата.

За почетници, сè што ви треба за купување е валиден пасош. По изборот на имотот, се потпишува договор помеѓу купувачот, агенцијата што посредува при набавката и трета страна, т.е. оној што е продавач.

Потребната документација ја собира агенцијата и наместо клиентот, таа аплицира во  катастарот за да добие имотен лист. После тоа, се чека терминот во катастарот, а државната комисија на  Турција врши проценка на недвижен имот и врз основа на проценетата вредност се плаќа државниот данок. Тој данок го плаќа купувачот и тој изнесува 4 проценти од процената вредност на недвижноста.

Кога данокот се плаќа и се добива терминот во катастарот, се добива имотен лист и недвижноста станува сопственост на купувачот. При потпишување и преземање на имотен лист во катастарот, купувачот добива преведувач на свој јазик по службена должност. Годишниот данок на недвижен имот се плаќа 0,03 од проценетата вредност на недвижноста.

Што се однесува до дополнителните трошоци, тука се трошоците за експертиза, подготовка на имотен лист, дозвола за употреба на станот, годишен данок, трошоци за поврзување на вода и електрична енергија, како и трошоци за одржување.

Процената на станот, т.е. вештачењето во просек чини од околу 167 евра до околу 240 евра, производството на имотен лист е 4 проценти од проценетата вредност на станот, а цената на дозволата за употреба е од 700 до 2.000 евра. Во некои случаи, инвеститорите бараат од купувачите да ги сносат трошоците за поврзување на вода и електрична енергија од околу 600 евра. Сепак, кај повеќето градежни компании, овие трошоци се вклучени во цената на станот.

Годишниот данок е околу 0,3 проценти од вкупната проценета вредност на станот. Што се однесува до месечното одржување на зградите, тоа зависи од „придружните објекти во комплексот“. Тие можат да изнесуваат максимум од 50 до 60 евра.