ТРИ ДЕЦЕНИИ МУЗИКА СОБРАНИ ВО ЕДНА КНИГА Од првиот настап до денес, „Суперхикс“ ја раскажуваат својата приказна

Повеќе од 30 години концерти, песни, турнеи и спомени се собрани на речиси 400 страници во монографијата „Суперхикс – Хроника на една гласна иронија“, чија

Македонскиот бенд „Суперхикс“ на 13 ноември ќе ја промовира монографијата посветена на нивната музичка историја. Книгата е дело на музичкиот публицист Тошо Филиповски и опфаќа период од 1994 година до денес. На околу 400 страници се документирани музичкото творештво, настапите и случувањата што го одбележале патот на групата.

Приказната почнува на 3 март 1994 година, кога „Суперхикс“ го имаа првиот настап во скопскиот клуб „Доорс“ во Дебар Маало. Бендот го формираа тројца средношколски другари – Петар Младеновски, Зоран Жежов и Борис Минов. Она што започна како гаражен панк-рок со примеси на ска и гранџ, со текот на годините прерасна во препознатлив звук во кој се испреплетуваат ска, панк, реге, латино, свинг и балкански музички влијанија.

Во текот на трите децении, низ групата поминаа повеќе музичари, а нејзиниот состав се менува и развива. Во интервју по повод 30-годишнината, фронтменот Петар Младеновски раскажа дека првиот настап бил документиран во неговиот младешки дневник, во кој ги запишувал концертите, изведените песни и впечатоците од музичките настани. Токму ваквите спомени и детали се дел од приказната што ја носи монографијата.

Промоцијата ќе се одржи во кафе-барот „Ван Гог“, со почеток во 20 часот. Публиката ќе има можност да слушне разговор со авторот Тошо Филиповски и членовите на „Суперхикс“, кои ќе раскажат за настаните и искуствата од долгогодишната кариера. Најавен е и краток акустичен настап на бендот.

Книгата ќе може да се купи на самото место по специјална промотивна цена, а посетителите ќе можат да добијат и потпишан примерок. За вечерта е подготвена и нова серија маици на „Суперхикс“.