ТРАНСРОДОВА ПЕЈАЧКА ВО ПАНК-БЕНД СО НОЖ УБИЛА УМЕТНИК СРЕД ЗАГРЕБ Убиениот бил познат по своите контроверзни настапи
Поранешната пејачка на загрепскиот панк-бенд „Абергаз“, позната по својата борба за трансродови права и авторка на романот „Две недели пред Третата светска војна“, претходно имала конфликт со уметникот В. Г., кој настапувал на улиците на Загреб. Двајцата живееле во алтернативниот културен простор Медика, а несогласувањата меѓу нив траеле подолго време – дури и во април била повикана полицијата по една расправија.
Жена во неделата со остар предмет убила маж во центарот на Загреб, објави Б92.
Сè се случило во 13:25 часот на улицата Пјеротијева, а според медиумите, осомничената била испрашувана синоќа, во неделата, а денеска, понеделник, се очекуваат нејзино приведување, распит пред истражен судија и одлука за истражен затвор.
Осомничената е 36-годишната Соња Храњец, која живеела во просторот Медика, откако останала без дом поради конфликт со семејството.
Поранешната фронтменка на загрепскиот панк-бенд „Абергаз“ јавно зборувала за проблемите со кои се соочуваат трансродовите лица, како и за нејзината промена на пол. Таа објавила и полуавтобиографски роман насловен „Две недели пред Третата светска војна“.
Убиениот, 43-годишниот В. Г., бил уметник кој изведувал улични перформанси во Загреб и исто така живеел во Медика.
Се верува дека несогласувањата меѓу нив траеле подолго време. Според неофицијални информации, Храњец и жртвата се скарале и во април, по што тогаш таа ја повикала полицијата.
– Ги гледавме и двајцата, знаеме дека тука живееја. Него го видовме пред 3 дена. Подобро го познававме него отколку неа бидејќи него го викавме кога од нивната зграда ќе паднеше нешто во нашето двориште, на пример цигли. Го викавме и за нередите што ги правеа нивните гости пред нашите влезови, но повеќе од тоа не знаеме – изјавиле соседи од улицата Пјеротијева.
Полицијата ја обезбеди сцената на злосторството со лента, а на местото на настанот пристигнале и пожарникари. Во просториите на Медика, каде што жената го убила мажот, влегле со клешти и со рефлектори.
Инаку, просторот на поранешната фабрика за лекови „Медика“ со години претставува едно од клучните места за независна култура и за собирање на млади во Загреб, како и „прибежиште“ за бројни уметници и креативци. Градскиот уред за имотно-правни работи и имот на Загреб во 2017 година побарал да се испразнат тие простории.
Откако здружението покрена петиција за стопирање на одлуката – која беше поддржана од уметници како Дарко Рундек, Мирела Приселац Реми и Вилим Матула – тогашниот градоначалник Милан Бандиќ, во обид да освои уште еден мандат, се повлече од намерата.
Инаку, Соња Храњец го променила полот пред околу 15 години. Пред транзицијата била позната како Њец Храњец и јавноста ја памети по нејзините перформанси, критики кон политиката за ветерани и по сатирични протести во Загреб.
Жртвата, В. Г., бил познат перформер, кој станал познат во 2017 година кога извел перформанс во кој ползел на колена од улицата Боговиќева до плоштадот на бан Јосип Јелачиќ.