ТРАМП ДЕЦИДЕН, НЕМА КРИМ И НЕМА НАТО Зеленски ита кон Вашингтон, ќе има ли гаранции за Украина?

„Претседателот Зеленски од Украина може да ја заврши војната со Русија речиси веднаш, ако сака, или може да продолжи да се бори“.

Вака напиша американскиот претседател Доналд Трамп на својата социјална мрежа Трут соушал во време кога украинскиот претседател Володимир Зеленски и неколку европски лидери се упатија кон Вашингтон на разговори за можен крај на војната.

„Се сеќавате како започна. Нема враќање на Крим даден од Обама (пред 12 години, без ниту еден истрел!), и НЕМА ВЛЕГУВАЊЕ ВО НАТО ОД УКРАИНА. Некои работи никогаш не се менуваат!!!“, додаде тој.

Трамп прво ќе се сретне со Зеленски во Овалната соба, а потоа со сите европски лидери заедно во Источната соба на Белата куќа.

Лидерите на Велика Британија, Германија, Франција, Италија, Финска, Европската Унија и НАТО се надеваат дека ќе го поддржат Зеленски во клучен дипломатски момент во војната и ќе спречат какво било повторување на незгодната средба во Овалната соба меѓу Трамп и украинскиот лидер во февруари.

Стив Виткоф, специјалниот претставник на Доналд Трамп, кој беше во Алјаска во петокот, 15 август, вчера за американските медиуми изјави дека Русија се согласила да им дозволи на САД и Европа да ѝ дадат на Украина „робусни“ безбедносни гаранции како дел од потенцијален мировен договор, јави Би-Би-Си.

Но, сè уште не е јасно каква форма би имале овие гаранции.

Виткоф изјави за Си-Ен-Ен дека на самитот во Алјаска било договорено дека САД и Европа би можеле „ефикасно да понудат јазик сличен на Член 5 за да покријат безбедносна гаранција“. Член 5 е договорот на НАТО во кој се наведува дека вооружен напад врз една земја-членка се смета за напад врз сите нејзини 32 членки.

Познатата клаузула вели дека земјите од НАТО ќе застанат во одбрана на сојузник кој е нападнат.

Зеленски ја опиша понудата за безбедносна гаранција на САД како „историска“. Таканаречената „коалиција на оние што се волни“, група сојузници на Украина, вклучувајќи ги Велика Британија, Франција и Германија, ветија дека ќе го заштитат мирот во Украина откако ќе се постигне.