ТОА Е ПРЕКИНАТ МЕХАНИЗАМ Алијанса за Албанците се оградува од Владата во врска со Отворен Балкан

Претстедателот на Алијансата на Албанците, Арбен Таравари, го изрази својот став и на партијата со која раководи, во врска со Отворен Балкан, иницијатива која, според неговото лично видување и мислење, неодамна ја напушти владата на Република Албанија.

„Сакам да ги уверам граѓаните дека Алијансата за Албанците се оградува од секоја нова иницијатива на Владата на Република Северна Македонија во рамките на веќе прекинатиот механизам познат како Отворен Балкан“, напиша Таравари.

Тој оценува дека со, според него, излегувањето на Република Албанија од Отворен Балкан, овој механизам станал бесмислен и нелегитимен.

„Дупликативните и неинклузивните механизми кои создаваат Западен Балкан со две брзини, не му помагаат на интегративниот дух во регионот. Патот напред е јасен: веќе потпишаните договори во рамките на Отворениот Балкан мора да бидат целосно интегрирани и имплементирани во рамките на Берлинскиот процес, почнувајќи од октомврискиот самит во Тирана“, е ставот на Таравари и на неговата партија.

На почетокот на месецов, при својата посета во Македонија, на заедничка пресконференција со премиерот Димитар Ковачевски, Еди Рама од новинарите беше запрашан дали ја смета иницијативата за завршена. Тој одговори:

– Не е моја вина доколку вие тоа сакате да го гледате како живот или смрт. Не е живот или смрт! Што е Отворен Балкан? Една од 72 иницијативи. Зошто беше преземена? Поради тоа што Берлинскиот процес имаше застој, не се движеше. Што донесе? Фантастични работи кои се реалност на луѓето кои ги користат договорите на Отворен Балкан за да тргуваат, се движат – рече Рама.

Меѓутоа Рама тогаш рече и дека доколку би имал можност да се врати назад, иницијативата Отворен Балкан би ја почнал 1.000 пати.

Вчера српската премиерка Ана Брнабиќ изјави дека е убедена дека иднината на иницијативата „Отворен Балкан“ е светла и дека на иницијативата ќе се приклучат и други од регионот. Таа вели дека не верува дека Еди Рама е против иницијативата.

– Без оглед на одредени изјави, а не верувам дека премиерот на Албанија, Еди Рама, е против иницијативата „Отворен Балкан“. Мислам дека и тој зборуваше за тоа. на последната прес-конференција за претседателот на Србија, Александар Вучиќ. Значи, верувам дека иднината на оваа иницијатива е светла и безбедна – рече Брнабиќ во заедничкото обраќање со премиерот на Северна Македонија, Димитар Ковачевски.

Инаку Еди Рама денеска во Тирана ќе биде домаќин на лидерите од регионот, како и на еврокомесарот за проширување и соседска политика, Оливер Вархељји, на неформална средба. Според приштинските медиуми, наместо косовскиот премиер Аљбин Курти, на состанокот во Тирина ќе присуствува неговиот заменик Бесник Бисљими, пренесува Kosovo-online.com.

Медиумите пишуваат дека односите меѓу Рама и Курти се заладиле.

Средбата ќе биде подготовка за самитот на Берлинскиот процес, кој беше најавен за 16 октомври во Тирана.

Учеството на состанокот во Тирана го потврдија премиерот на Северна Македонија Димитар Ковачевски, премиерката на Србија Ана Брнабиќ, вршителот на должноста премиер на Црна Гора Дритан Абазовиќ, како и претседателката на Советот на министри на Босна и Херцеговина Борјана Кришто.