ТОЈ Е ИНТЕЛИГЕНТЕН И ИСКУСЕН, ЌЕ НАЈДЕ РЕШЕНИЕ Путин јавно го пофали Трамп
Колку што можам да замислам, новоизбраниот претседател е интелигентна и веќе доста искусна личност, рече рускиот лидер фалејќи го американскиот колега.
Рускиот претседател Владимир Путин го пофали новоизбраниот американски претседател Доналд Трамп како „интелигентен“ и „искусен“ додека зборуваше за новинарите во четвртокот, пренесува Њузвик.
– Колку што можам да замислам, новоизбраниот претседател е интелигентна и веќе доста искусна личност – им рекол Путин на новинарите во Казахстан, според Си-Ен-Ен.
Тој додаде дека е оптимист дека администрацијата на Трамп ќе може да ги олесни напорните односи меѓу САД и Русија.
– Мислам дека ќе најде решение – рече Путин за Трамп.
Рускиот претседател, исто така, се осврна на мноштвото обвиненија против Трамп, од кои некои беа отфрлени овој месец, нарекувајќи ги „понижувачки, неосновани судски постапки“.
Забелешките на Путин дојдоа еден ден откако Трамп го номинираше пензионираниот генерал-полковник Кит Келог за негов специјален пратеник за Украина и за Русија.
„Кит водеше истакната воена и деловна кариера, вклучително и служење на високо чувствителни улоги за национална безбедност во мојата прва администрација. Тој беше со мене уште од самиот почеток!“, напиша Трамп на „Truth Social“.
Келог остро го критикуваше пристапот на администрацијата на Бајден кон војната во Украина, пишувајќи во април дека Белата куќа требало да склучи договор со Путин во јануари 2022 година, непосредно пред Русија да ја отпочне окупацијата на Украина, во замена за одложување на приемот на Украина во НАТО за една деценија.
Путин исто така имаше остри зборови за Бајден во четвртокот, според Си-Ен-Ен, обвинувајќи ја администрацијата на Бајден дека му создава „дополнителни тешкотии“ на тимот на Трамп со тоа што ѝ дозволи на Украина да истрела армиски тактички ракетни системи или АТАКМС врз руски цели.
Трамп и Путин разговараа по телефон по победата на Трамп на ноемвриските избори во САД. Според „Вашингтон пост“, во разговорот Трамп го предупредил рускиот лидер од понатамошна ескалација на војната, но и дека сака да разговара за решение.
Кремљ демантираше дека имало телефонски разговор.
Новоизбраниот претседател водеше кампања со ветување дека ќе ја прекине руско-украинската војна за еден ден.
Украинскиот претседател Володимир Зеленски во своето ноќно обраќање во четвртокот изјави дека Путин е тој што ја ескалира војната за да оневозможи Трамп да ѝ стави крај на војната откако ќе биде инаугуриран во Белата куќа на 20 јануари.
Зелески и Трамп разговараат по победата на Трамп на изборите. Украинскиот лидер го опиша разговорот како одличен.