Пожарот кај Селци и Локов ги измачи екипите на терен, натрупани суви гранки и цели пресечени дрвја го отежнаа гаснењето, а доброволци од Битола со денови се бореа со огнот. Жариштето сега е под контрола и остана активна само кратка линија, соопшти директорот на Дирекцијата за заштита и спасување, Стојанче Ангелов.

ДЗС сега ќе утврдува зошто на теренот имало толку многу исечена вегетација. Дел од дрвјата останале на земјата и добро се исушиле.

– Овде огнениот тим на ДЗС, составен од доброволци од Битола, се измачи, бидејќи има премногу исечена вегетација – рече Ангелов.

Екипите интервенираа и од воздух. Според Ангелов, користеле ертрактори и хеликоптер, но сувата вегетација го отежнувала гаснењето.

– Со овој пожар се измачивме и, како што веќе реков, сè уште има еден активен дел, но тој не претставува закана за околните населени места, ниту пак гори квалитетна шума – рече Ангелов.

3 ертрактори над Рамно

Активна остана и една локација кај Рамно. ДЗС денес дејствува со сите три ертрактори и очекува целосно да го изгасне пожарот.

– Во овој момент немаме алармантни пожари, сите пожари се ставени под контрола, но сè уште е активен пожарот на Рамно, на само една локација. Врз него денес дејствуваме со трите ертрактори и очекуваме да биде целосно изгаснат – рече Ангелов.

Под контрола е и пожарот кај Белица, во насока кон ловиштето „Јасен“. Ангелов рече дека не претставува опасност за ловиштето.

Огнот таму се движи ниско по земјата, а екипите не му дозволуваат да го премине сртот.

– Добро е тоа што не горат борови и дрвја, односно пожарот се одвива ниско по земјата – рече Ангелов.

Пожарот кај Коштионак е целосно под контрола. Екипите претходно цел ден дејствуваа со полициски хеликоптер.

Сезоната сè уште не завршува

Ангелов предупреди дека опасноста не поминала. Вчера во земјава имало над 30 пожари на отворено.

– За жал, сезоната на пожари на отворен простор сè уште не е завршена. Вчера повторно имавме над 30 пожари – рече Ангелов.

Очекуваниот дожд во Западна Македонија помогна само на неколку локации. Најмногу придонесе за догасувањето на пожарот над Вруток.

Ангелов нагласи дека состојбата може да се промени и во текот на денот.

– Тоа не значи дека во попладневните часови нема да се појават нови пожари. Затоа апелирам до граѓаните да бидат внимателни – рече Ангелов.

Дождот може да ја затвори сезоната

ДЗС сега ги очекува најавените посериозни врнежи за сабота и за недела. Ако прогнозата на УХМР се оствари, Ангелов очекува тие да го означат крајот на долгата сезона на пожари.

– Нестрпливо ги очекуваме. Доколку нивните прогнози се остварат, тогаш би требало да дојде и крајот на оваа сезона на пожари – рече Ангелов.

The post ПОЖАРОТ КАЈ СЕЛЦИ И ЛОКОВ ГИ ИЗМАЧИЛ ПОЖАРНИКАРИТЕ Ќе се утврдува зошто на теренот имало толку исечени дрвја и суви гранки appeared first on plusinfo.mk.

Пожар избил вчера над изворот на Вардар, Вруток, пожарот се наоѓа на тешко пристапен терен, а гостиварските пожарникарите успеале да го стават под контрола. Сѐ уште постои опасност од негово ширење зашто се наоѓа на тешко пристапен терен, соопшти денеска Стојанче Ангелов, директор на Дирекцијата за заштита и спасување.

Тој се надева дека врнежите кои се најавени за попладнево ќе ги изгаснат сите жаришта.

Ангелов вели дека во моментов нема алармантни пожари во земјава, но дека сѐ уште гори во местото Рамно на Скопска Црна Гора.

– Пожар од селото Белица вчера навлезе во ловиштето Јасен. Неколку огнени тимови со пинцгауери се обидоа да го изгаснат, утрово немаше пожар. Но постои опасност повторно да избувне во попладневните часови. Сепак, се надевам дека прогнозата на УХМР ќе испадне точна и дека ќе падне дожд и ќе стави крај на овој пожар кој може да прерасне во многу непријатен пожар – рече Ангелов.

Вчера имало повеќе од 30 пожари.

The post АНГЕЛОВ СО ДУША ГО ЧЕКА НАЈАВЕНИОТ ДОЖД Избил пожар над изворот на Вардар appeared first on plusinfo.mk.

Сите три „ер трактори“ на Дирекцијата за заштита и спасување денеска дејствуваат врз пожарот кој од страната на Македонски Брод навлегува кон територијата на ловиштето „Јасен“, информира директорот на ДЗС, Стојанче Ангелов.

Авионите им помагаат на екипите од ловиштето кои се обидуваат да го сопрат пожсрот.

Според Ангелов, огнот во моментов не претставува голем ризик, но постои опасност доколку навлезе во боровата шума.

– Засега огнот не е толку ризичен, но доколку навлезе во боровата шума може да ни се повтори она што се случуваше во минатото – рече тој.

Ангелов очекува дека ќе ја прекинат огнената линија во насока на селото Белица или кај рибникот.

– Сè уште имаме големо горење, но јас сум оптимист дека пожарот овој пат нема да влезе во ловиштето „Јасен“, бидејќи удираме на него со сите сили – рече тој.

Ангелов информира дека освен овој пожар сè уште е активен и огнот кај местото викано Рамно во селото Брест во Општина Чучер-Сандево на Скопска Црна Гора. Според него, скопјани денеска не го чувствуваат чадот од овој пожар, а ветерот засега не прави дополнителни проблеми.

Активен е и пожарот на границата меѓу општините Струга и Дебар, во атарот на селото Селци, каде што интервенираат струшките пожарникари. За овој терен за рано наутро е најавено испраќање дополнителни екипи, бидејќи огнот сè уште не е ставен под целосна контрола.

Ангелов вели дека во попладневните часови се регистрирани повеќе од 20 нови активни пожари и упати благодарност до сите пожарникари и сите ангажирани екипи кои даваат максимални напори во справувањето со огнената стихија.

Директорот повторно апелираше до граѓаните за зголемена претпазливост предупредувајќи дека пред нас се неколку тешки дена и дека најавените врнежи од дожд најверојатно ќе доцнат.

The post ПОЖАР МУ СЕ ЗАКАНУВА НА РЕЗЕРВАТОТ „ЈАСЕН“ Екипите се борат со сите расположливи средства appeared first on plusinfo.mk.

Пожарот на македонско-косовската граница кој беше активен неколку дена е целосно изгаснат и нема опасност од нов чад за скопјани, информира првиот човек на Директорот на Дирекцијата за заштита и спасување, Стојанче Ангелов.

– Во овој момент нема горење ниту од македонска, ниту од косовска страна и нема да предизвикува загаденост на воздухот во Скопје – рече Ангелов истакнувајќи дека неделата, 6 септември, бил еден од најинтензивните денови за пожарникарите воаа сезона.

Во неделата избувнале повеќе од 40 пожари на отворено, од кои 30 се изгаснати, додека 4 остануваат активни.

Се гасне пожарот кај Рамно, пак се активира пожарот кај Милетинo 

Најголемиот предизвик за пожарникарите останува пожарот кај Рамно, на Скопска Црна Гора. Утрово во гаснењето се вклучи и полициски хеликоптер.

На терен работат скопските пожарникари и огнените тимови на ДЗС. Вклучени се и неколку тима од Национални шуми. Армијата испрати 30 припадници за заштита на објектот на врвот Рамно.

Пожарот кај Милетинo, во Општина Брвеница, повторно се активира во текот на ноќта. Пожарникарите и тим на ДЗС го ставија под целосна контрола во раните утрински часови.

Цела ноќ битка со огновите кај Ругинце

Пожарникарите го изгаснаа и пожарот кај Ругинце, во Општина Старо Нагоричане. Ангелов им се заблагодари на екипите од Старо Нагоричане и од Ранковце.

– Пожртвувано, изложувајќи се на ризик, работеа во текот на ноќта и успеаја да го изгаснат тој пожар кој зафати, би рекол, огромна површина – рече Ангелов.

Активен останува и пожарот кај Белица, во Општина Македонски Брод. Теренот е тешко пристапен, а на одредени места е целосно непристапен.

Пожарот кај Тајмиште е под контрола

Пожарот кај Селци и кај Локов во текот на ноќта значително ослабе. Утрово повторно покажа знаци на горење. На терен излегоа пожарникарите од Струга, а по потреба ќе биде испратен и воздухоплов.

Пожарот кај Тајмиште, Кичевско, е ставен под целосна контрола.

Ангелов предупреди дека високите температури може повторно да ги разгорат жариштата и да предизвикаат нови пожари.

– Повторно апелирам до сите граѓани да бидат исклучително внимателни, бидејќи доволна е само искра за вистинска катастрофа – порача Ангелов.

The post ПОЖАРОТ НА ГРАНИЦАТА СО КОСОВО Е ИЗГАСНАТ, НЕМА ОПАСНОСТ ЗА СКОПЈАНИ Пожарникарите вчера имале интензивен ден, Скопска Црна Гора останува најголем предизвик appeared first on plusinfo.mk.

Опасноста од пожари и натаму е висока, а во моментов има шест активни пожари на отворен простор, од кои неколку се посложени за гаснење. Најкомплексен во моментов е пожарот во реонот Рамно на територијата на Општина Чучер Сандево, каде гори ниска вегетација, папрат, трева и грмушки, а на одредени места огнот зафаќа и шумска подлога, истакна директорот на Дирекцијата за заштита и спасување (ДЗС), Стојанче Ангелов.

Додека ја даваше изјавата помина хеликоптерот што гасне и Ангелов беше натопен со вода.

– Пожарот се движи по земја и ја зафаќа лисната и тревната подлога, поради што се создаваат големи количини чад. Силниот ветер го насочува чадот кон Скопје и околните населени места на падините на Скопска Црна Гора – истакна Ангелов.

На терен интервенираат скопски пожарникари, неколку огнени тимови на ДЗС, припадници на Армијата, како и полициски хеликоптер кој дејствува на критичните точки со цел да се спречи ширењето на пожарот.

Тој информира дека во текот на вчерашниот ден биле регистрирани повеќе од 30 пожари на отворен простор, од кои најголемиот дел се изгаснати благодарение на интервенциите на пожарникарите и останатите служби ангажирани во справувањето со огнените стихии.

Активен останува и пожарот над селата Грачани и Никиштане, кој се спушта кон Лепенец, но со намален интензитет и, како што рече Ангелов, денеска се очекува да биде ставен под целосна контрола.

Повторно се активирал и пожарот на подрачјето меѓу Струга и Дебар, во атарите на повеќе села, каде интервенираат струшките пожарникари.

Активни пожари има и во атарот на селото Тајмиште во Општина Кичево и кај селото Белица во Општина Македонски Брод, каде теренот е исклучително тежок и непристапен.

Директорот на ДЗС упати апел до граѓаните да бидат крајно внимателни.

– За денеска се најавени високи температури и засилен ветер. Доволна е само една искра за да предизвика сериозна катастрофа, затоа апелирам до сите граѓани одговорно да се однесуваат и да избегнуваат активности што можат да предизвикаат пожар – порача Ангелов

The post 🎥 ХЕЛИКОПТЕРОТ ГО ИСТУШИРА СТОЈАНЧЕ АНГЕЛОВ Чад од пожарот во Чучер Сандево се чувствува во Скопје appeared first on plusinfo.mk.

Активни се два поголеми пожара во земјава кои зафаќаат поголема површина и се комплексни за гасење.

Првиот е на територија на Скопје, во општина Ѓорче Петров, во селата Грачани и Никиштане.

– Во овој момент двете села не се загрозени од пожарот иако кај населението постои одредена загриженост – вели Стојанче Ангелов, директор на Дирекцијата за заштита и спасување.

Пожарот навлезе во земјава од Косово пред 3 дена. За негово гаснење се делува и од земја и од воздух, но за жал се уште е активен.

– Синоќа почна да дува ветер со насока од пожарот кон градот Скопје и чадот можеа да го почувствуваат скопјани од повеќето скопски општини. Чадот предизвика вознемиреност меѓу поголем дел од населението на градот Скопје. Рано утрово врз овој пожар дејствуваа скопските пожарникари засилени со неколку тимови од Дирекцијата за заштита и спасување и со пинцауери. Тие работат по линијата на огнот и се обидуваат да ја намалат. Од воздух поддршка дава еден армиски хеликоптер, еден полициски хеликоптер, како и два ер тракора. Очекувам до доцна вечерва овој пожар да биде ставен под делумна контрола – рече Ангелов.

Вториот голем пожар е во Струга и граничи со Дебар. Линијата на огнот е многу голема, а пожарот се одвива на тешко пристапен терен, зафаќа мешовита шума, нискостеблести растенија, грмушки. Таму попладне ќе се гасне со ер тракторите.

Вчера биле подметнати два пожара на Китка, еден во Студеничани, а друг во Зелениково, но се изгаснати.

Ангелов апелира до граѓаните да внимаваат да не предизвикаат пожар и да пријават сомнително однесување. Тој вели дека пожарникарите треба да се насочат кон гаснење на големите пожари, и дека не треба да се трошат силите на нови жаришта.

– Некој упорно подметнува пожари на планината Жеден – нагласи Ангелов.

И покрај дождот, бројот на пожари во Македонија не се намалува. Во текот на вчерашниот ден регистрирани се 31 пожар.

The post БЕСНЕЕ ПОЖАРОТ ВО ГРАЧАНИ, МОЖНИ СЕ НОВИ НАВЕВИ ОД ЧАД ВО СКОПЈЕ Ангелов очекува ноќеска да се воспостави делумна контрола врз овој пожар appeared first on plusinfo.mk.

Мирис на чад и изгорено вечерва се чувствува во повеќе делови од Скопје поради големиот пожар во пограничниот реон кај селото Грачани, во Општина Ѓорче Петров.

Пожарот во текот на ноќта навлегол на македонска територија од косовска страна и се движел во атарот на Грачани. Огнената линија била долга повеќе од пет километри, а огнот зафатил сува трева, ниска вегетација и шума.

Поради непристапниот планински терен, гаснењето било отежнато. На терен биле ангажирани скопски пожарникари, тимови на Дирекцијата за заштита и спасување, како и два „ер трактори“ кои интервенирале од воздух.

Директорот на ДЗС Стојанче Ангелов претходно информираше дека пожарот се приближил до Грачани и претставувал закана за селото, но дека непосредната опасност за населените места била исклучена. Со помош на воздушните сили, огнената линија била пресечена на критичните места за да се спречи ширењето кон селото.

Во вечерните часови последиците од пожарот се почувствуваа и во главниот град. Ветерот го носи чадот од планинскиот пограничен појас кон пониските делови на Скопската котлина, поради што мирисот на изгорено се чувствува во повеќе населби.

Пожарот кај Грачани, сепак, не е единствената страна на огнената стихија во овој пограничен реон.

По барање на Република Косово, Македонија денеска за првпат ангажираше државен воздухоплов за гаснење пожар надвор од својата територија.

Хеликоптер на Министерството за внатрешни работи интервенира во реонот на Хани и Елезит, каде што продолжува борбата со пожарот на косовска територија. Информацијата ја потврди директорот на Центарот за управување со кризи, Мухамед Али.

Али посочи дека по приемот на барањето од Косово бил воспоставен директен и континуиран контакт со надлежните институции, во координација со раководителот на Главниот штаб, Стојанче Ангелов, со цел навремено да се активираат македонските капацитети.

Со тоа, двете земји истовремено се справуваат со пожарот кој го зафатил пограничниот простор, додека македонските екипи продолжуваат со активности за да се спречи повторно ширење на огнот кон македонска територија и населените места.

Засега нема информации дека селото Грачани е директно загрозено од пожарот, но поради близината на огнот и променливите услови на теренот, ситуацијата останува под внимателно следење.

The post СИЛЕН МИРИС НА ЧАД СЕ ЧУВСТВУВА ВО СКОПЈЕ ОД ПОЖАРОТ ВО ГРАЧАНИ Огнената линија е подолга од пет километри appeared first on plusinfo.mk.

Тежок пожар има во атарот на селата Локов и Буринец во Струга, каде гори неквалитетна шума, грмушки и трња, а постои опасност пожарот да зафати и квалитетна шума, соопшти денеска директорот на Дирекцијата за заштита и спасување Стојанче Ангелов.

– Се размислува за користење хеликоптер за гаснење, но во топлите часови од денот неговата употреба е ограничена. Упатени се повеќе екипи на Национални шуми кои се обидуваат да го стават под контрола овој пожар – вели Ангелов.

Вчера попладне избил пожар во Штипско под падините на планината Серта.

Со овој пожар се обидуваат да се справат доброволните пожарникари од Штип, а рано утрово е испратен и полициски хеликоптер, кој значително помогнал да се стави под контрола еден крак од пожарот. Во Штипско зафатена е ниска вегетација.

The post ТЕЖОК ПОЖАР БЕСНЕЕ ВО СТРУШКО Постои опасност да зафати квалитетна шума appeared first on plusinfo.mk.

Пожарот под Пелистер е ставен под целосна контрола по жестоката битка со огнот во текот на ноќта, соопшти Стојанче Ангелов, првиот човек на Дирекцијата за заштита и спасување. Новото опасно жариште е кај селото Градец во општина Врапчиште, каде што гори борова шума.

Од 23 пожари на отворено регистрирани вчера, седум утрово сè уште се активни, информира Ангелов.

Најтешката битка изминатите два дена се водела во подножјето на Пелистер. Пожарот почнал од преспанската страна, а огнот вчера ја преминал противпожарната пресека.

– Во текот на вчерашниот ден, во текот на ноќта, во текот на утрово водевме жестока битка со пламените јазици и можам да кажам дека утрово овој пожар беше ставен по целосна контрола – изјави Ангелов.

Екипите успеале да ја запрат огнената линија што вчера попладне излегла над противпожарната пресека. На терен се пожарникари од Ресен со силна поддршка од нивните колеги од Битола.

Ангажирани се и тимови на Дирекцијата за заштита и спасување со пет „пинцгауери“. Во текот на ноќта на терен дејствувале и доброволни пожарникари.

Во гаснењето утрово се вклучил и армиски хеликоптер со ведро од три тони. По него треба да дејствуваат два „ертрактори“ на Дирекцијата, а по потреба и полициски хеликоптер.

– Со еден збор концентрирани се големи сили за ставањето под контрола на овој голем пожар, но се работи за еден од најтешките шумски пожари оваа сезона – изјави Ангелов.

Главната цел е огнот да не навлезе во квалитетната шума на Националниот парк Пелистер.

Второто тешко жариште се отвори синоќа кај селото Градец во општина Врапчиште, информира Ангелов. Пожарот зафати борова шума на тешкопристапен терен.

Полициски хеликоптер почна да дејствува рано утрово. Близината на мало езеро му овозможува да полни вода и да прави нов налет на секои пет до шест минути.

– Хеликоптерот помага за значително намалување на кракот којшто се движи кон селото – вели Ангелов.

Тој вели дека на терен се и гостиварските пожарникари. Доколку биде потребно, ќе бидат испратени дополнителни сили.

Активни се уште неколку пожари на поголеми површини. Според Ангелов, тие во моментов не се алармантни и не загрозуваат населени места.

Опасноста од нови пожари, сепак, останува многу висока низ целата држава. Дождот во источните делови само краткотрајно ја намалил сувоста на вегетацијата, смета првиот човек на ДЗС.

– Целата држава е високоризична од појава на пожар и притоа пожарите лесно може да се шират, особено ако на зафатените подрачја дува ветер – предупреди Ангелов.

The post ПО ЦЕЛОНОЌНА БИТКА, ПОЖАРОТ ПОД ПЕЛИСТЕР Е ПОД КОНТРОЛА Ново опасно жариште кај Градец, гори борова шума appeared first on plusinfo.mk.

Следи уште една пеколна и долга ноќ за сите нас кои остануваме на терен – соопшти во неделата вечерта директорот на НП Пелистер, Иванчо Тошевски.

– Главното дејство на силите во текот на ноќта ќе биде насочено по должина на границата помеѓу Национални шуми и Национален парк Пелистер во правец север – југ на надморска висина помеѓу 1050 – 1150 метри над т.н. битолски пат кој ги поврзува превалец Ѓавато со с.Подмочани. Целта е да се искористат пониските температури во текот на ноќта и конечно да се сузбие најкритичниот фронт од пожарот- вели тој

Во моментов се работи на самиот фронт на огнот од непосредна близина.

– Во еден момент ја имате целосната контрола, но со првата промена на временските услови работите се менуваат во истиот момент. Екипите на НП Пелистер делуваат со поддршка на ДПД Архангел, ППЕ на РЕК Битола и ТППЕ Ресен. Најважно е високото ниво на мотивираност на единиците и покрај тоа што поединци се без спиење од скоро 48 часа- истакна директорот.

Претходно директорот на Дирекцијата за заштита и спасување Стојанче Ангелов информираше дека пожарот што изби од преспанската страна и се движи кон Националниот парк „Пелистер“ и понатаму е најтежок и најкомплексен за гасење во земјава, а во негово то сузбивање се вклучени копнени сили, механизација, ер-трактори и армиски хеликоптер.

Тој ги негираше извештаите дека при гаснењето има повредени.

– Досега не е повреден ниту еден пожарникар. Не е точна веста којашто се појавила во некои портали дека има двајца повредени пожарникари — ниту повреден пожарникар, ниту пак имаме пожарникар којшто вдишал чад, така што сите пожарникари се добро и продолжуваат во борбата против оваа огнена стихија – посочи Ангелов.

Во меѓувреме, воздухопловниот ВИНГ на Армијата соопшти дека бил ангажиран во гаснењето на шумскиот пожар во месноста Макази, на падините на Националниот парк „Пелистер“, во реонот на Општина Ресен.

Како што информираат од Армијата, хеликоптер Ми-8МТ реализирал тричасовен налет, при што биле исфрлени 14 противпожарни ведра, односно вкупно 28 тони вода врз активните жаришта.
Гаснењето од воздух се одвивало со истовремена поддршка од земја, во координација со екипите кои се ангажирани на терен.

The post ПОЖАРНИКАРИТЕ ВО ПЕКОЛНА НОЌНА БИТКА ЗА ПЕЛИСТЕР Огнот тешко се става под контрола поради ветрот appeared first on plusinfo.mk.