Мајката на руската научничка, која почина откако наводно се заразила со чума, тврди дека приказната за несреќа во лабораторијата не е вистинита. Дарја Шипилова (28), техничарка во Сибирскиот истражувачки институт за борба против чумата во Иркутск, почина на 2 октомври во болница во блискиот Шелехов.

Околностите за нејзината смрт и натаму не се разјаснети. Локални функционери и провладини медиуми објавија, а потоа ги избришаа информациите, дека причината за смртта била чума. Кремљ ги отфрли тие тврдења и негираше дека се воведени какви било посебни мерки.

Светската здравствена организација (СЗО) во средата побара од Русија дополнителни објаснувања за извештаите за втор, непотврден случај на чума во Сибир, како и повеќе детали за смртта на научничката.

Светлана Шипилова, мајката на починатата научничка, која и самата е медицинска работничка, за рускиот портал „Глубина“ изјави дека не верува во верзијата на настаните што се шири во јавноста.

– Ја знам вистината. Морам да се пазам од глупави познаници кои поверуваа во сето тоа, а паметните, се разбира, не поверуваа – рече таа.

Таа ја отфрли тезата дека станувало збор за несреќа во лабораторијата.

– Таква епрувета е невозможно да се скрши, тоа не го разбираат ни сите медицински стручњаци. Не би се скршила ни ако со сета сила ја фрлите во ѕид. Тоа може да го каже само лаик. Теоретски е невозможно содржината да се истури или епруветата да пукне, бидејќи се исклучително добро заштитени – објасни таа.

На новинарите им порача:

– Едноставно, ја оставија ќерка ми да умре.

Според информациите што се појавија во локалните медиуми, Шипилова се заразила со белодробна чума откако била изложена на патогенот при несреќа во лабораторијата. Иако функционерите тоа официјално не го потврдије, новинарот од Иркутск Павел Степанов е еден од оние кои тврдат дека научничката „го сокрила тоа што се случило“, откако наводно скршила епрувета.

И пријателите на починатата се сомневаат во приказната за скршената епрувета. За локалниот портал „Луѓе од Бајкал“, кој руските власти го прогласија за „странски агент“, тие изјавиле дека Шипилова била исклучително одговорна.

– Ја оцрнија, а притоа ни не утврдија што навистина се случило – рекол нејзин поранешен соученик.

– Не можам оваа приказна да ја поврзам со Даша каква што ја познавав. Звучи како да зборуваат за некоја друга личност. Беше исклучително вредна и одговорна, па ова за мене нема никаква смисла – додал друг пријател.

– Даша беше исклучително паметна. Ретки од нашиот отсек добиваат работа во тој институт. Тоа е сериозна установа, таму сè се сфаќа сериозно и процедурите се безбедни – рекол познаник од факултетот.

Русија се соочува со сè поголем меѓународен притисок транспарентно да ги објави сите информации за смртта на лабораториската работничка. Руската санитарна инспекција, „Роспотребнадзор“, официјално тврди дека Шипилова починала од „воспаление на белите дробови со непозната етиологија“, додека шефот на регионот Бурјатија изјавил дека причината за смртта сепак била чума. Властите во околните градови ги предупредиле жителите да не патуваат во Шелехов.

Во јавноста се појавија и фотографии со прашалници за „чума“ кои пациентите мора да ги пополнуваат при доаѓањето во породилиштето во Иркутск.

Загриженоста се одразува и на интернет. Според податоците на рускиот портал „Верстка“, пребарувањата за поимот „чума“ на „Гугл“ се зголемиле за 50 пати во однос на минатиот месец. Побарувачката за респиратори во онлајн продавниците „Озон“ и „Вајлдберис“ се удвоила за една недела, а е забележан и пораст на пребарувањата за костими на „доктор на чума“ во пресрет на Ноќта на вештерките.

The post ПРИКАЗНАТА ЗА ПУКНАТА ЕПРУВЕТА Е ЛАГА! Мајката на лаборантката почината наводно од чума вели дека ја знае вистината appeared first on plusinfo.mk.

Светската здравствена организација (СЗО) сè уште нема целосни информации за смртта на 28-годишната лабораториска работничка Дарја Шипилова во Сибир, за која постои сомнеж дека починала од белодробна чума, додека руските власти категорично негираат дека станува збор за чума и тврдат дека нема ризик од епидемија.

Шипилова, која работеше во Истражувачкиот институт за борба против чумата во Иркутск, почина на 2 октомври, само два дена откако разви симптоми слични на настинка, а состојбата потоа нагло ѝ се влоши. Руската санитарна служба „Роспотребнадзор“ соопшти дека таа починала од „пневмонија со непозната етиологија“ и дека во нејзините примероци не се пронајдени микроорганизми поврзани со нејзината професионална работа.

Случајот привлече внимание затоа што Шипилова работеше во институт специјализиран за особено опасни заразни болести. Во руските и меѓународните медиуми се појавија непотврдени информации дека на 25 септември, додека работела во лабораторијата, можеби скршила епрувета со материјал што содржел бактерија „Yersinia pestis“, предизвикувачот на чумата. „Роспотребнадзор“ ја отфрла оваа верзија и тврди дека комисијата не утврдила никаква несреќа со патогени микроорганизми во институтот.

Постојат и други непотврдени верзии за тоа каде можела да се зарази, меѓу кои патување во Тајланд или престој во област во близина на границата со Монголија. Досега нема јавни докази што потврдуваат ниту една од овие верзии.

Речиси 200 луѓе под медицински надзор

По смртта на Шипилова, околу 200 луѓе кои можеле да бидат во контакт со неа, беа ставени под медицински надзор и во карантин. Повеќе од 60 вработени во институтот беа изолирани во објектот, а карантински и превентивни мерки беа воведени и во повеќе болници во Иркутск и околината, меѓу кои и болницата во Шелехов, каде што Шипилова беше лекувана.

Досега, меѓу контактите не е потврдена инфекција со чума. Според најновите информации од руските власти, биле направени речиси 5.000 тестирања на околу 200 лица и не е откриен опасен патоген. Околу 60 отсто од лицата ставени под надзор во меѓувреме се ослободени од карантин.

„Роспотребнадзор“ сега тврди дека нема епидемиолошки ризик и дека санитарно-епидемиолошката состојба во Иркутската област е стабилна. Според последните податоци, кај контактите биле откриени два случаи на Ковид-19 и два случаи на риновирус, но не и други опасни заразни патогени.

СЗО бара повеќе информации од Москва

Сепак, СЗО предупредува дека сè уште нема доволно информации за целосна процена на случајот.

Генералниот директор на СЗО, Тедрос Аданом Гебрејесус, рече дека организацијата од Русија побарала дополнителни податоци, вклучително и резултатите од лабораториските тестирања на починатата и на лицата со кои била во контакт, причините поради кои биле преземени јавноздравствените мерки и информации за нивната здравствена состојба.

– Навремената, целосна и транспарентна размена на информации е клучна за разјаснување на спротивставените извештаи и точна процена на потенцијалните ризици за јавноста – изјави Тедрос.

СЗО дополнително побара објаснување за непотврдени извештаи за втор вработен со пневмонија со неутврдено потекло. Организацијата потврди дека го проверува овој навод и сè уште чека одговор од руските власти.

Русија тврди дека навреме ја известила СЗО

Москва во меѓувреме отфрла дека не соработува со СЗО. Портпаролот на Кремљ, Дмитриј Песков, рече дека Русија ја известила Светската здравствена организација за смртта на лабораториската работничка во согласност со воспоставените процедури.

Песков ги обвини медиумите за ширење неточни информации и порача дека за случајот треба да се користат податоците што ги објавува „Роспотребнадзор“.

Руската здравствена служба претходно соопшти дека кај лицата кои биле во контакт со Шипилова не е откриен случај на чума, а превентивните мерки постепено се ублажуваат откако тестирањата не покажаа присуство на опасен патоген.

Случајот го следат и САД

Случајот привлече внимание и во Вашингтон. Американскиот државен секретар Марко Рубио побара од Москва да сподели повеќе информации за смртта на Шипилова, додека американските власти проценуваат дека ризикот за САД е многу низок.

Белата куќа побара поголема транспарентност од руската страна, но досега нема докази дека инфекцијата се проширила надвор од Иркутската област. СЗО, врз основа на достапните информации, го проценува ризикот надвор од Русија како многу низок.

Чумата ја предизвикува бактеријата „Yersinia pestis“. Белодробната форма е особено опасна затоа што може да се пренесува од човек на човек преку респираторни капки при близок контакт. Болеста може да се лекува со антибиотици доколку се препознае и третира навреме.

The post СЗО НЕМА ЦЕЛОСНА СЛИКА ЗА СМРТТА НА ЛАБОРАНТКАТА ВО СИБИР Москва тврди дека нема чума, но речиси 200 луѓе се под медицински надзор appeared first on plusinfo.mk.

Светската здравствена организација (СЗО) побара од руските власти информации по медиумските извештаи дека уште еден лабораториски работник боледува од пневмонија од неутврден причинител.

СЗО, исто така, побара дополнителни податоци за да се разјасни причината за тешката пневмонија и да се утврди патогенот што довел до воведување мерки за јавно здравје, објавија британските медиуми.

Руската служба за здравствен надзор вчера објави дека не се регистрирани случаи на чума кај лицата кои биле во контакт со лабораторискиот работник на Институтот за проучување на антракс, кој почина минатата недела.

Лабораториски работник во Истражувачкиот институт за борба против чума во Иркутск, на југоистокот на Сибир, почина на 2 октомври под сè уште нејасни околности, а причината за смртта беше „пневмонија со непозната етиологија“.

Дарија Шипилова (28), која работеше во истражувачки институт, скршила епрувета со патогенот на пневмонична чума на 25 септември. Подоцна, на 29 септември, беше примена во болница со симптоми на тешка пневмонија и почина ноќта помеѓу 1 и 2 октомври.

Руските власти соопштија дека не пронашле докази дека нејзината болест е предизвикана од кој било од патогените со кои работела и рекоа дека ситуацијата е под контрола. Болницата каде што била лекувана работничката била ставена во карантин, додека околу 200 лица кои биле во контакт со неа биле подложени на строг медицински надзор.

Случајот со Дарја Шипилова ги зголеми шпекулациите дека најверојатно патогенот бил генетски менуван, односно дека било развивано биолошко оружје.

Д-р Дру Пински, угледен американски лекар, со повеќедецениско клиничко и академско искуство, истовременот активен во јавноста, за Њузмакс оцени дека нема причина за паника поради сомнението за белодробна чума во Русија. Тој објасни дека пневмоничната чума може да се пренесува од човек на човек преку респираторни капки, но дека нејзиното пренесување не е лесно и обично бара близок контакт. Пински нагласи и дека чумата се лекува со антибиотици, но дека кај белодробната форма е од клучно значење терапијата да почне што е можно порано.

Според Пински случајот со Шипилова е „малку збунувачки“ бидејќи лаборантката не можела да се зарази од скршената епрувета, дури и „да ја ставила во уста“. Тој претпоставува дека Шипилова била изложена на невообичаено голема доза и затоа нејзината состојба брзо се влошила и покрај третманот.

– Раниот третман е клучен во сите овие случаи, но кај оваа аеросолна верзија, изгледа дека таа била изложена на толку голема доза, што антибиотиците не делувале. Тоа е сосема поинаква ситуација, но би требало да може да се стави под контрола – наведе Пински.

На прашањето дали инцидентот вклучувал форма на чума наменета за оружје, докторот истакна дека е за очекување руската лабораторија за борба против чума да поседува примероци од оваа болест. Според него не е изненадувачки да се истражувале верзии на бактеријата со оглед на тоа што во Русија има 65.000 луѓе кои работат со биолошки материјали.

– Важно е да се запамети дека е доволен само еден патник во авион и работите навистина би можеле да излезат од контрола. Сепак, во овој случај, тоа не е толку веројатно – посочи Пински.

The post УШТЕ ЕДЕН СЛУЧАЈ СОМНИТЕЛЕН НА ЧУМА ВО РУСИЈА, СЗО БАРА ДЕТАЛНИ ИНФОРМАЦИИ Експертите стравуват дека станува збор за патоген менуван за развој на биолошко оружје! appeared first on plusinfo.mk.

Европската комисија и земјите-членки на Европската Унија денеска на состанокот на Комитетот за здравствена безбедност ќе разговараат за сомнежите за појава на пневмонична чума во Сибир, по смртта на лабораториска работничка во Иркутск.

Темата е ставена на дневен ред на Комитетот, кој ги разгледува сериозните прекугранични закани по здравјето. Европските здравствени власти внимателно ја следат ситуацијата, иако засега нема потврдена појава на чума ниту докази за пренесување на болеста меѓу луѓето.

Светската здравствена организација во вторникот одржа брифинг во Женева за случајот и соопшти дека сè уште нема официјално потврдена причина за смртта на лабораториската работничка. СЗО е во контакт со руските здравствени власти и ги проверува околностите на случајот, направените лабораториски тестови и состојбата на лицата што биле во контакт со починатата.

Според првичната проценка на СЗО, ризикот е умерен до низок за Иркутската област, низок за Русија во целина и многу низок за европскиот регион. Од организацијата велат дека проценката ќе биде ажурирана доколку се појават нови информации.

Во меѓувреме, руските власти ја информирале СЗО дека во Иркутск нема потврдени случаи на чума. Тие соопштиле дека лицата кои биле во контакт со починатата се идентификувани и дека тестовите кај нив не покажале присуство на опасни заразни патогени.

И Европскиот центар за превенција и контрола на болести (ЕЦДЦ) соопшти дека сомнежот за појава на чума сè уште не е потврден и дека нема пријавени секундарни случаи или докази за континуирано пренесување од човек на човек. Според ЕЦДЦ, ризикот за ЕУ е низок, а болеста може ефикасно да се лекува со антибиотици.

Случајот предизвика претпазливост и во земјите од Централна Азија. Казахстан, Киргистан и Узбекистан ги засилија санитарните и епидемиолошките контроли, особено на границите, поради можноста за внесување на заразни болести од Русија. Мерките се превентивни и не значат дека во овие земји е регистрирана чума.

Сомнежите за чума се појавија откако 28-годишна лабораториска работничка во Иркутск почина на 2 октомври од тешка пневмонија со нејасно потекло. Таа работела во институт кој се занимава со патогени, меѓу кои и бактеријата што ја предизвикува чумата, по што руските власти ставија под медицински надзор околу 200 лица кои биле во контакт со неа.

Според светската платформа за мониторинг на чумата, во светот во моментов има еден смртен случај, 28 потврдени случаи, 189 суспектни кои се хоспитализирани и 200 лица под надзор.

The post ЕУ ЗАСЕДАВА ЗА СОМНЕЖОТ ЗА ЧУМА ВО СИБИР Русија не го потврдува случајот, а СЗО проценува дека ризикот за Европа е низок appeared first on plusinfo.mk.

Жена почина од белодробна чума во регионот Иркутск, во Сибир, (источна Русија), објави синоќа регионален функционер, додека руските медиуми објавија дека десетици луѓе се во карантин.

Според локалните медиуми, од оваа заразна болест почината е 28-годишната лабораториска техничарка Дарија Шипилова.

Рускиот медиум „Народите на Бајкал“ (Peoples of Baikal) објави дека Шипилова работела во Институтот за превенција од чума во Иркутск и дека можеби добила белодробна чума преку скршена епрувета.

Во карантин се ставени околу 200 лица со кои можеби таа била во контакт, додавата локалните медиуми, без да дадат дополнителни детали.

Руското Министерство за здравство се уште се нема огласено за случајот.

Алексеј Циденов, гувернерот на руската област Бурјатије, претходно на социјалните мрежи објави дека жената од соседниот регион Иркутск „умрела од чума“.

Чумата е опасна инфективна болест предизвикана од зоонотската бактерија Yersinia pestis, која во зависност од начинот на пренос се манифестира во неколку различни клинички форми, од кои најпознати се бубонската и белодробната чума.

Додека најраспространетата, бубонска форма, се пренесува преку каснување од заразени болви и предизвикува болни отоци на лимфните јазли, белодробната чума е најтешкиот и највирулентниот облик кој ги напаѓа белите дробови и е единствениот што се пренесува директно од човек на човек по воздушен пат.

Доколку не се дијагностицираат навреме и не се третираат со итни антибиотици, и двата типа на болеста имаат исклучително висока стапка на смртност.

Најголемата и најсмртоносната епидемија на бубонска чума во историјата е позната како „Црна смрт“, која беснеела низ Евроазија и Северна Африка во периодот од 1346 до 1353 година. Оваа разорна пандемија збришала процентуално помеѓу 30% и 60% од целокупното население во Европа и однела проценети 75 до 200 милиони човечки животи. Болеста предизвикала масовен општествен колапс, пустошење на цели градови и села, но истовремено оставила трајни економски последици како недостиг на работна сила, што индиректно придонело за пропаст на феудализмот и зачеток на нови социо-културни реформи на континентот.

The post ВО РУСКИОТ РЕГИОН ИРКУТСК ЖЕНА ПОЧИНА ОД ЧУМА! Истата болест во 14 век уби околу половина од населението на Европа appeared first on plusinfo.mk.

LOOKS LIKE SMOKE but it’s THOUSANDS of MOSQUITOES — CAR DRIVES INTO SWARM in SIBERIA pic.twitter.com/xshH9lTuuZ

— RT (@RT_com) September 21, 2026

The post 🎥 А ИЗГЛЕДАШЕ КАКО ЧАД? Нема да ви се верува низ каков облак помина овој автомобил appeared first on plusinfo.mk.

Воздухот е загаден, снегот понекогаш е обоен, темнината трае 45 дена, а странците не можат да влезат без посебна дозвола

Длабоко во Сибир, на крајниот север на Русија, се наоѓа Норилск – еден од најизолираните и климатски најекстремните градови во светот.

Градот се наоѓа во Арктичкиот круг, на околу 2.400 километри од Северниот Пол и приближно 3.000 километри од Москва. Во него живеат околу 176.000 луѓе, што го прави најголемиот град северно од Арктичкиот круг со повеќе од 150.000 жители.

Норилск е изграден врз вечен мраз, односно пермафрост, и практично нема копнена врска со остатокот од Русија. До градот се стигнува со авион или со брод преку пристаништето Дудинка, додека зимската пловидба е отежната поради мразот на реката Енисеј.

Дополнителна изолација претставува и неговиот статус на затворен град. За странците влезот е можен само со посебна државна дозвола.

Град изграден со помош на Гулагот

Развојот на Норилск започнал поради огромните наоѓалишта на никел, бакар и паладиум. Советските власти во 1935 година започнале со изградба на голем индустриски комплекс, а за тешката работа биле користени затвореници од Норилскиот гулаг.

Во следните две децении низ логорот поминале околу половина милион луѓе. Во суровите арктички услови, илјадници починале од глад, исцрпеност и смрзнување.

По смртта на Сталин во 1953 година, затворениците организирале еден од првите големи протести против системот на гулазите. Логорот конечно бил затворен во 1956 година, но индустријата продолжила да го одредува животот на градот.

Загадувањето се гледа со голо око

Денес Норилск е еден од најголемите светски центри за производство на никел и бакар. Компанијата „Норникел“ вработува голем дел од населението.

Но, индустрискиот развој оставил огромни последици врз животната средина.

Топилниците со децении испуштале големи количества сулфур диоксид, азотни оксиди и други штетни материи. Поради тоа, околните шуми биле сериозно оштетени од загадувањето и киселите дождови.

Почвата е оптоварена со тешки метали, а снегот во одредени периоди може да добие црвеникава, портокалова или розова нијанса поради индустриските честички.

Норилск во 2020 година беше погоден и од голема еколошка катастрофа, кога од резервоар истекле огромни количества дизел и навлегле во околните водотеци.

45 дена без сонце

Ниту климата не им го олеснува животот на жителите.

Норилск во поголемиот дел од годината е под снег, а просечната јануарска температура се движи околу минус 30 степени Целзиусови.

Во периодот на поларната ноќ, сонцето не се појавува околу 45 дена. Во лето, пак, сонцето не заоѓа приближно 65 дена.

Екстремниот студ, изолираноста и долгата зима го прават секојдневието особено тешко.

И покрај сите услови, Норилск останува важен индустриски центар на Русија – град изграден врз вечен мраз, опкружен со тундра, рудници и индустриски постројки, каде што суровата природа и тешката историја се дел од секојдневниот живот.

The post 📽️ ГО НАРЕКУВААТ НАЈДЕПРЕСИВНИОТ ГРАД НА СВЕТОТ Сонце нема 45 дена, температурите паѓаат до минус 30, а снегот може да стане црвен appeared first on plusinfo.mk.

Претседателот на Украина, Володимир Зеленски, синоќа изјави дека одобрил продолжување на операциите со долг дострел на руска територија, а воедно е ажуриран и списокот на приоритетни цели.

– Одржав состанок посветен на нашите операции со долг дострел. Го одобривме нивното продолжување и го ажуриравме списокот на приоритетни цели, врз основа на нивното моментално влијание врз Русија и нејзината способност да ја продолжи и пролонгира оваа војна – наведе Зеленски.

Тој истакна дека украинските средства за напад сега имаат дострел поголем од 3.000 километри, а Украина продолжува да ги развива своите капацитети за изведување удари на уште поголеми растојанија.

Зеленски прецизираше дека украинските беспилотни летала можат да погодат цели во рускиот Уралски регион, Сибир и други области далеку од Москва.

Според него, од почетокот на војната, во рамки на кампањата за напади со долг дострел, биле извршени повеќе од 1.000 удари. Меѓу погодените цели се нафтени капацитети, воени производствени погони и стратешки важна руска логистичка инфраструктура.

– Главната цел на нападите со долг дострел е да се изврши притисок врз Русија преку уништување на нејзиното производство на оружје, предизвикување загуби во нафтениот сектор и економијата, како и враќање на војната на нејзина територија – истакна Зеленски.

The post ЗЕЛЕНСКИ НАЈАВИ НОВА ОФАНЗИВА Украина одобри напади на повеќе од 3.000 километри во Русија appeared first on plusinfo.mk.

Меѓународен тим научници од Русија и од САД дошол до фасцинантен заклучок. Tимот анализиран древен човечки катник пронајден во Сибир. Според истражувачите, неандерталците користеле камени алатки за дупчење на оштетени заби во обид да ја ублажат силната болка.

– Откритието јасно укажува дека тие веројатно биле запознаени со можноста за ублажување на забоболка преку ваков вид третман – се наведува во официјалниот извештај од истражувањето.

Станува збор за заб стар околу 59.000 години, откриен во пештерата Чагирскаја на планинскиот масив Алтај во Сибир. Научниците велат дека ова е еден од најстарите познати материјални докази што упатуваат на можни стоматолошки интервенции кај пралуѓето.

The world’s oldest example of successful dentistry can be traced back to Neanderthals about 59,000 years ago, new research suggests https://t.co/4L7ZqVlm2N

— The Wall Street Journal (@WSJ) May 14, 2026

Експертите забележале голема празнина што се протега од површината за џвакање до пулпната комора на забот. Според нив, оштетувањето не изгледа природно.

– Ова недвосмислено укажува на намерно и свесно механичко дејствување – наведуваат истражувачите.

Антропологот од Универзитетот во Аризона, Џон Олсен, оценил дека ваквиот наод укажува на високо ниво на рачна умешност и когнитивни способности кај неандерталците.

– За успешно изведување на толку сложени зафати биле потребни напредни способности и добра координација – посочил Олсен.

The post ЗАБ СТАР 59.000 ГОДИНИ ЈА МЕНУВА ВИСТИНАТА Неандерталците биле повешти одошто се мислеше appeared first on plusinfo.mk.

Македонија и регионот се соочуваат со температури под нулата. На многумина им е тешко да го поднесат студот, но не знаат дека луѓето од рускиот град Јакутск би „зовреле“ доколку беа тука.

Во сибирскиот град, живата паѓа до „пропаст“, ​​на -71 степен Целзиус! Покрај тоа, просечната температура во јануари е околу -50 степени.

Многумина се прашуваат како луѓето преживуваат во овие нехумани услови. Некои од одговорите ги даде Марија Солко, жителка на Јакутск. Таа ги сподели своите коментари со светот во видео. Даде одговори за тоа како изгледаат куќите на екстремен студ, како преживуваат и како се загреваат.

Земјата е постудена од воздухот

Повеќето жители се греат со централно греење. Сепак, иако не е логично, цевките за топла вода не се под земја поради замрзнатата земја, туку над земјата! Тоа е преседан за остатокот од светот. Главниот проблем со овој систем е што станарите не можат да ја регулираат температурата – станот може да биде или премногу ладен или премногу топол.

Од друга страна, оние што имаат индивидуално греење на гас можат сами да ја прилагодат температурата во домот. Марија, исто така, откри голема разлика во цените, додека таа плати само осум долари во декември, нејзините роднини во зграда со централно греење добија сметка од дури 130 долари.

За да се задржи топлината внатре, зградите често имаат три влезни врати, а речиси сите куќи се направени од дрво, бидејќи таков материјал е најдобро прилагоден на екстремни услови. Мов се користи како природна изолација, која ги исполнува просторите меѓу гредите.

Јакутск се наоѓа околу 450 километри јужно од Арктичкиот круг, а она што го прави посебен е фактот што земјата никогаш не се одмрзнува, дури ни во лето. Иако температурите можат да надминат 30 степени во текот на летото, земјата останува трајно замрзната.

Градот има околу 355.500 жители, а луѓето главно се занимаваат со сточарство и риболов. Жителите велат дека едвај го чувствуваат студот, бидејќи телото и мозокот со текот на времето се навикнуваат на екстремни услови.

Во најстуденото населено место во светот, Ојмјакон, нема канализација бидејќи цевките замрзнуваат. Тоалетите се претежно надвор од куќите, мобилните телефони замрзнуваат, а автомобилите не се исклучуваат преку ноќ во зима, бидејќи не би можеле да ги запалат наутро.

The post 📽️ ЕВЕ КАКО ГО ГРЕАТ ГРАДОТ НА -71 СТЕПЕН! Марија од Сибир шокира, премногу е жешко во становите, тука нема контрола appeared first on plusinfo.mk.