Фински специјализирани нуркачи денеска успеаја да ги извлечат телата на двајца италијански државјани кои настрадаа длабоко во подводна пештера на еден од атолите на Малдивите, потврдија официјални претставници на оваа островска држава во Индискиот Океан.

Спасувачките тимови претходниот ден ги лоцираа телата на четворица од вкупно петмина италијански нуркачи, кои исчезнаа минатиот четврток во внатрешноста на подводниот пештерски систем. Телото на петтиот Италијанец, кој работел како инструктор по нуркање, беше пронајдено уште на самиот почеток на потрагата пред влезот на пештерата. Акцијата беше привремено прекината во саботата откако загина воен нуркач од Малдивите, по што продолжи со поддршка на странски експерти. Според планот на спасувачите, преостанатите две тела од подводната пештера треба да бидат извлечени во текот на утрешниот ден.

Портпаролот на владата на Малдивите, Ахмед Шам, претходно информираше дека тројца искусни фински нуркачи работат на извлекување на настраданите кои се наоѓаат на длабочина од околу 60 метри. Инаку, дозволениот лимит за аматерско нуркање на Малдивите изнесува 30 метри, додека за секое спуштање на длабочина поголема од 40 метри е неопходна специјалистичка обука и професионална опрема.

Владата соопшти дека финските експерти, поддржани од локалната полиција и војска, ги откриле телата во најоддалечениот и најпростран дел од подводниот комплекс.

– Како што се претпоставуваше, четирите тела беа пронајдени заедно, длабоко во третиот сегмент на пештерата, кој е воедно и нејзин најголем дел – изјави владиниот портпарол.

Џорџа Сомакал, Миника Монтефалконе и Џанлука Бенедети (Фото: Универзитет на Џенова)

Според информациите од италијанското Министерство за надворешни работи, петтемина Италијанци ја истражувале пештерата на длабочина од околу 50 метри во атолот Вааву. Четири од жртвите биле дел од научен тим од Универзитетот во Џенова, и тоа професорката Моника Монтефалконе, нејзината ќерка Џорџа Сомакал, како и истражувачите Муриел Оденино и Федерико Гуалтиери. Петтиот настрадан е Џанлука Бенедети, кој бил управител на бродот и нивни нуркачки инструктор.

ПРОФЕСОРКА, НЕЈЗИНАТА ЌЕРКА И УШТЕ ТРОЈЦА ЗАГИНАА ПРИ НУРКАЊЕ ВО МАЛДИВИ Отворена истрага

The post ИЗВЛЕЧЕНИ ТЕЛАТА НА ДВАЈЦА ОД ПЕТТЕМИНА ИТАЛИЈАНЦИ ШТО СЕ УДАВИЈА НА МАЛДИВИТЕ Пронајдени се во подводна пештера длабока 50 метри appeared first on plusinfo.mk.

ЈП Водовод и канализација – Скопје ги информира граѓаните на Скопје дека во тек е акцијата за отплата на заостанатите долгови без пресметка на камата за задоцнето плаќање.

Акцијата за отплата на долговите на рати без камата е со определено времетраење, а рокот за искористување на оваа можност истекува на 05.06.2026 година.

– Ги повикуваме сите корисници кои имаат заостанат долг за потрошена вода (тужен и редовен), да ја искористат можноста за плаќање на рати без пресметана камата – велат од Водовод.

Одлуката за спроведување на акцијата за отплата на заостанатите долгови без пресметка на камата не важи за органите на државната и локалната власт и другите државни органи основани согласно Уставот и со закон и институциите кои вршат дејности од јавен интерес утврден со закон, а организирани како агенции, фондови, јавни установи и јавни претпријатија основани од Република Македонија или од општините, од градот Скопје, како и од општините во градот Скопје.

По истекот на овој период одлуката престанува да важи.

За секоја дополнителна информација за услугите на ЈП Водовод и канализација – Скопје контактирајте ги на 02 3073 010, Дежурно Информативен Центар, 02 3240 300, Дирекција, како и на мејловите kontakt@vodovod-skopje.com.mk и www.vodovod-skopje.com.mk.

The post ПЛАТЕТЕ ДОЛГ ЗА ВОДА БЕЗ КАМАТА Акцијата на Водовод трае до 5 јуни 2026 година appeared first on plusinfo.mk.

Речиси 270 лица осомничени за трговија со недозволени медицински средства се уапсени, а 66 криминални групи се разбиени во полициска операција спроведена во 90 земји, соопшти денеска Интерпол.

Организацијата изрази особена загриженост поради злоупотребата на антипаразитски производи, односно нивната употреба надвор од пропишаниот или законски медицински контекст. Операцијата „Пангеа XVIII“ (Pangea XVIII), спроведена во март на сите континенти, резултираше со заплена на повеќе од шест милиони нелегални лекови во вредност од 15,5 милиони долари, се наведува во соопштението на меѓународната полициска организација со седиште во Лион.

Меѓу запленетите нелиценцирани или фалсификувани лекови имало препарати за еректилна дисфункција, седативи, лекови против болки, антибиотици и средства за одвикнување од пушење.

– Благодарение на онлајн пазарите и неформалните синџири на снабдување, криминалците можат да ги искористат регулаторните празнини, а целна група им се луѓето што бараат брзи или поевтини начини на лекување – изјави генералниот секретар на Интерпол, Валдеси Уркиза, предупредувајќи на сериозни, па дури и фатални последици.

Организацијата забележала нагло зголемување на заплените на антипаразитски лекови, особено препарати против црви одобрени исклучиво за ветеринарна употреба. Овие производи, кои често се претставуваат како додатоци во исхраната, се продаваат како „алтернативни третмани за лекување рак“, но таквите тврдења не се поткрепени со никакви научни докази.

Употребата на вакви производи беше забележана уште за време на пандемијата на Ковид-19, соопшти Интерпол.

Побарувачката за фармацевтски производи поврзани со различни „перформанси“ и „животен стил“, како што се стероиди и пептиди, и натаму расте, „поттикната од популарноста на бодибилдингот и фитнесот“, додава организацијата.

Еден од позначајните случаи во рамки на операцијата било откривањето таен погон за производство на лекови во Бугарија, каде што биле запленети милиони таблети, ампули и инјекциски препарати.

Во Буркина Фасо властите заплениле 384.000 антибиотски капсули, додека во Брегот на Слоновата Коска во едно возило биле откриени еден тон фалсификувани таблети ибупрофен.

The post АКЦИЈА НА ИНТЕРПОЛ ВО 90 ЗЕМЈИ ПРОТИВ НЕЛЕГАЛНИ ЛЕКОВИ Уапсени 270 лица, запленети лекови во вредност од 15,5 милиони долари appeared first on plusinfo.mk.

На 8, 9 и 10 мај, по шести пат ќе се одржи годишната и најмасовната еко-акција во земјава и на целиот Балкан – „Генералка викенд“. Рекордниот еко-настан мобилизира десетици илјади волонтери од 80 општини, 600 организации, јавни институции и приватни компании.

Ова е најголемата логистичка операција досега за собирање отпад и подигнување на еколошката свест кај граѓаните. „Генералка викенд“ прерасна во национална годишна традиција која докажува дека грижата за татковината може да обедини луѓе од различни, општествени, културни и јавни средини.

Акцијата ќе се спроведува три дена истовремено на повеќе од 500 локации, во 80 општини низ целата земја. Овие еко-акции се организирани и координирани од општините во соработка со Црвениот крст.

Официјалниот настан за отворањето на „Генералка викенд“ 2026 е во 9 часот на 8 мај и ќе го води Град Скопје со чистење на кејот на реката Вардар. Еко акцијата е организирана и поделена во осум тимови, на потегот од реката Лепенец до мостот „Киро Глигоров“ ќе бидат распоредени на северната и јужната страна на реката Вардар. Во соработка со Комунална хигиена и Паркови и зеленило ќе бидат мобилизирани стотици волонтери од приватни компании, институции и училишта за да ја исчистат најголемата зелена и рекреативна зона во главниот град.

Помеѓу многуте активности, се спроведуваат и посебни акции како што се: Чистење на дивите сметилишта во Националниот парк Шар Планина, предводени од 20 припадници на Вооружените сили на Р.С. Македонија, чувари на Националниот парк, експертски тим на австриската компанија за управување со отпад Саубермахер и локалното население. Како и еко-акција во Охрид (Конгресен центар), за заштита на крајбрежјето, во соработка со студенти и професори од Универзитетот „Свети Кирил и Методиј“, Општина Охрид, клубовите Сороптимист Мома Охрид и Сороптимист Вадуц, како дел од најстарата и најголема светска женска организација Сороптимист Интернешнл и со поддршка на Саубермахер.

Покрај сите активности за чистење на терен, преку соработката меѓу Министерството за образование и наука и УНИЦЕФ, еко-образовната програма „Еко час“ се спроведува во училиштата низ целата земја и во соработка со „Генералка викенд“.

Еко-акцијата е волонтерска иницијатива, каде што учесниците се одговорни за сопствената безбедност и стана најголемата еколошка акција досега во нашата земја.

Успехот е резултат на долгогодишно партнерство помеѓу „Генералка викенд“ и официјалните партнери: Пивара Скопје, Пакомак, Нула Отпад, Макстил, ЕВН, ИУТЕ, Саубермахер, КАЗ Груп и Шпаркасе Банка. Нивниот придонес и заедничките заложби за почиста татковина и правилно управување со отпадот ја движат еко акцијата напред.

Организации како ЗЕЛС, Црвениот крст, со институционална поддршка од многу министерства, УНИЦЕФ, Универзитетот „Свети Кирил и Методиј“ и Вооружените сили на Р.С. Македонија, стотици невладини организации и општините ја пренесуваат пораката гласно и јасно: Подготвени сме да го рециклираме отпадот од минатото за зелена иднина! Максимата на иницијативата останува иста: „Да се извалкаме и да исчистиме!“

The post 📷ГОДИНАШНИОТ „ГЕНЕРАЛКА ВИКЕНД“ ЌЕ ГИ УРНЕ СИТЕ РЕКОРДИ! Пријавени се десетици илјади волонтери, 80 општини, 600 организации и 250 државни институции appeared first on plusinfo.mk.

ЈП Комунална хигиена-Скопје започна акција со која граѓаните ќе можат да ги подмират заостанатите долгови за собирање и транспортирање на комунален отпад без пресметана камата за задоцнето плаќање.

Од претпријатието информираат дека мерката се однесува на корисници кои имаат долг евидентиран на заедничката сметка со ЈП Водовод и канализација-Скопје, како по основ на редовни, така и на тужени сметки.

„Започна акција за отплата без пресметана камата за задоцнето плаќање за сите корисници кои имаат заостанат долг“, соопштуваат од Комунална хигиена.

Можноста за плаќање без камата е временски ограничена и ќе трае од 20 април до 5 јуни 2026 година. Од претпријатието апелираат граѓаните да ја искористат оваа можност за да ги регулираат своите обврски и да избегнат дополнителни трошоци.

The post БЕЗ КАМАТА ЗА СТАРИТЕ ДОЛГОВИ Комунална хигиена со акција за граѓаните appeared first on plusinfo.mk.

Во глобална операција во која учествуваа 21 земја, со поддршка на Европол е откриена мрежа вмешана во нарачани DDoS кибер напади, соопштени денеска европската полициска агенција.

Во рамките на координираната операција наречена PowerOFF, испратени се мејлови и писма со предупредување до 75.000 корисници, а четири лица се уапсени, додека истовремено се отстранети 53 домени и издадени се 25 налози за претрес, се додава во соопштението.

Како што се наведува, во заедничката акција учествувале Австралија, Австрија, Белгија, Бразил, Бугарија, Данска, Естонија, Финска, Германија, Јапонија, Летонија, Литванија, Луксембург, Холандија, Полска, Португалија, Шведска, Тајланд, Обединетото Кралство и Соединетите Американски Држави.

На акцијата ѝ претходеа низа оперативни состаноци на експерти од националните полициски служби ширум светот за да спроведат мерки против корисниците на DDoS платформите и да ја подигнат свеста за незаконитоста на овие активности.

Припадниците на полицијата на земјите учеснички во акцијата ги прекинаа илегалните активности, демонтирајќи ја техничката инфраструктура која го поддржува извршувањето на нарачаните DDoS кибер напади врз целни веб-страници, сервери или мрежи. Нивната инфраструктура се состоела од сервери, бази на податоци и други технички компоненти кои овозможуваат нарачување на DDoS активности. Со запленувањето на оваа инфраструктура, властите беа во можност да ги попречат овие криминални операции и да спречат понатамошна штета по жртвите. Запленетите бази на податоци им овозможија на експертите на Европол да ги поддржат своите национални колеги во обезбедувањето податоци за преку три милиони криминални кориснички сметки, што доведе до низа координирани акции ширум светот.

DDoS нападите по нарачка се едни од најплодните и најлесно достапните трендови во кибер криминалот, овозможувајќи им на поединци со малку техничко знаење да ги следат упатствата чекор по чекор за извршување криминални напади. Овие кибер напади нанесуваат значителна штета на фирмите и поединците ширум светот таргетирајќи сервери, веб-сајтови или онлајн сервиси и правејќи ги недостапни за легитимните корисници.

Во рамките на операцијата PowerOFF, која продолжува, преземени се координирани напори на меѓународните полициски сили со цел разбивање на криминалната инфраструктура за изведување DDoS напади, се наведува во соопштението. Кога станува збор за поддршката на Европол, оваа агенција првенствено спроведе анализа на запленетите бази на податоци, ги идентификуваше и ги лоцираше корисниците и дистрибуираше известувања до сите држави членки на ЕУ и земјите со оперативни договори.

Како што се наведува, Европол исто така обезбеди аналитичка поддршка, експертиза во крипто-следење и форензичка помош. Европската полициска агенција, освен тоа, организираше следење на истражните траги во подготовка за завршната фаза на операцијата и воспостави команден пункт за време на акцијата.

Европската мултидисциплинарна платформа против криминални закани (EMPACT) се занимава со најважните закани кои ги претставуваат организираниот и тешкиот меѓународен криминал кој ја погодува ЕУ, се наведува во соопштението на Европол. Како што се додава, EMPACT ја зајакнува разузнавачката, стратешката и оперативната соработка меѓу националните власти, институциите и телата на ЕУ и меѓународните партнери. Платформата EMPACT функционира во четиригодишни циклуси фокусирајќи се на заедничките приоритети на ЕУ во областа на криминалот, наведено е во соопштението на европската полициска агенција.

The post ВО АКЦИЈА НА ЕВРОПОЛ И 21 ЗЕМЈА РАЗБИЕНА МРЕЖА ЗА КИБЕР НАПАДИ Уапсени 4 лица, претресени 25 локации, згаснати 53 домени appeared first on plusinfo.mk.

Американскиот претседател Доналд Трамп потврди дека и вториот член на екипажот на соборениот борбен авион Ф-15 е успешно спасен од иранска територија. Операцијата, која Трамп ја опиша како „една од најхрабрите и најопасните во американската историја“, стави крај на повеќечасовната неизвесност за судбината на американскиот полковник кој се наоѓаше зад непријателските линии.

По соборувањето на авионот Ф-15Е Страјк Игл од страна на иранската противвоздушна одбрана, првиот пилот беше спасен веднаш, додека офицерот за вооружување беше исчезнат повеќе од еден ден. Трамп соопшти дека вториот член на екипажот има повреди, најверојатно здобиени при катапултирањето, но нагласи дека неговата состојба е стабилна. Иако претседателот тврди дека во мисијата нема загинати или ранети американски војници, Би-Би-Си известува дека дошло до директен „контакт“ и судир меѓу американските и иранските сили за време наизвлекувањето.

Додека траеше операцијата, иранските државни медиуми објавија за воздушни напади во планинскиот предел на провинцијата Кохгилује и Бојер-Ахмад во југозападен Иран, каде што се верува дека се наоѓал американскиот офицер. Локалните власти потврдија дека во овие напади загинале најмалку четири лица, обвинувајќи ги САД и Израел за бомбардирањето. Засега не е официјално потврдено дали овие напади биле директно поврзани со мисијата за спасување.

Иранската револуционерна гарда соопшти дека за време на потрагата по американскиот екипаж успеала да собори американски дрон во провинцијата Исфахан. Иако Вашингтон сѐ уште не ги потврдил овие наводи, социјалните мрежи беа преплавени со видеоснимки на кои се гледа како ирански сили пукаат кон американски хеликоптери од типот Блек Хок. Трамп изјави дека во операцијата биле вклучени „десетици авиони“ опремени со најмоќното оружје на светот.

Пред американските сили да стигнат до својот војник, иранската војска понуди награда од околу 60.000 долари за секој што ќе го фати американскиот офицер жив. Снимките покажуваат дека и стотици локални жители се вклучиле во потрагата по непријателските предели, но американските специјални единици успеале први да стигнат до него и да го евакуираат на безбедно.

The post ВО ДРАМАТИЧНА АКЦИЈА СПАСЕНИ ДВАЈЦАТА ПИЛОТИ КАТАПУЛТИРАНИ ВО ИРАН Ангажирани десетици авиони, престрелка со Иранците, гаѓан хеликоптер, соборен дрон… appeared first on plusinfo.mk.

Премиерот Христијан Мицкоски вечерва изјави дека случајот со петте тони дрога, кои завршиле во Србија и за кои српското обвинителство тврди дека потекнуваат од Македонија, е сериозен и очекува во текот на деновите Министерството за внатрешни работи да објави информации за десетици тони дрога која незаконски е пуштена во промет или складирана.

– Тоа е сериозен случај. Станува збор за проект кој во минатото го водеше претходната влада, доведувајќи голем дел од граѓаните и инвеститорите во заблуда дека така ќе станат милионери и дека сè ќе се случува поинаку, во рамки на економска трансформација. Тоа беше практично економската политика на владата на СДСМ и ДУИ. Очекувам деновиве МВР да излезе со десетици тони недозволени материи, дрога, марихуана, кои моментално се наоѓаат во складиштата во Македонија или преку одредени правни субјекти незаконски пуштени во промет, и тоа и во земјата, и надвор од неа – потенцираше Мицкоски во гостување во вестите на МРТ.

Премиерот додаде дека она што граѓаните ќе го слушнат за случајот ќе биде навистина катастрофално и дека креаторите на ваквите политики од минатото треба да бидат одговорни за многу млади луѓе кои станале жртви на овој начин на функционирање.

– Граѓаните ќе бидат сведоци на една многу тешка и мачна ситуација. Оваа акција трае со години и не сме можеле секогаш јавно да објавуваме бројки и податоци. Но, она што ќе го слушнат и видат овие денови ќе биде навистина нешто катастрофално. Сите креатори на тие политики треба да бидат одговорни за многу млади луѓе коишто, за жал, станале жртви на ваквиот начин на функционирање – нагласи Мицкоски.

The post ДЕСЕТИЦИ ТОНИ ЗАПЛЕНЕТА ДРОГА ЧЕКААТ ДА БИДАТ ОБЈАВЕНИ Мицкоски открива факти за случајот со марихуаната appeared first on plusinfo.mk.

Вкупно десет лица се казнети во Струмица деновиве, затоа што го загадувале воздухот со палење отпад на отворено, информираа општинските власти по координираната акција со струмичката полиција.

Лицата добија казни од 50 до 250 евра заради загадување на животната средина. Шестмина се казнети за прекршување на комуналниот ред, а четворица за горење отпад на отворено.

Во акциите досега се запленети и околу 50 килограми бакар добиен од горење кабли.

Општината соопшти дека во тек се и инспекциски надзори над фирми кои поседуваат Б-интегрирани еколошки дозволи.

За да се лоцираат жариштата на аерозагадување општината распиша набавка на шест нови мерни станици за да има увид во реално време каков е воздух по одделни квартови во градот.

The post ДЕСЕТМИНА КАЗНЕТИ ЗА ПАЛЕЊЕ БАКАРНИ КАБЛИ ВО СТРУМИЦА Ќе платат од 50 до 250 евра appeared first on plusinfo.mk.

Сите јавни претпријатија на Град Скопје денеска се мобилизирани и се вклучени во сеопфатна и темелна акција за чистење на Клиничкиот центар „Мајка Тереза“ – срцето на македонското здравство, кое секојдневно го посетуваат илјадници граѓани од сите делови на државата, напиша градоначалникот на Скопје Орце Ѓорѓиевски на својот профил на Фејсбук.

„Оваа акција е директен одговор на оправданите реакции и забелешки од граѓаните за долгогодишната негрижа кон овој исклучително важен комплекс. Местото каде што се лекува народот мора да биде чисто, безбедно и достоинствено. Се перат и се чистат улиците и паркинзите, се сече и се отстранува опасната вегетација, се чистат сливниците, се метат сите површини со специјализирани возила и се подига кабастиот и комуналниот отпад. Секој агол се уредува со цел Клиничкиот центар да добие лик каков што заслужува“, објави Ѓорѓиевски.

Градоначалникот Ѓорѓиевски истакна дека ова е почеток на континуирана грижа, а ваквите акции ќе продолжат и во иднина.

Фото; Фејсбук профил на градоначалникот Орце Ѓорѓиевски

The post ТЕМЕЛНА ГЕНЕРАЛКА НА КЛИНИЧКИ ЦЕНТАР, СЕ ЧИСТИ СЕКОЈ АГОЛ Ѓорѓиевски вели дека ова ќе биде редовна пракса appeared first on plusinfo.mk.