ТАА САКА ДА ГО „ИСЧИСТИ“ БАЛКАНОТ ОД РУСКО ВЛИЈАНИЕ Која е идната премиерка на Велика Британија?

Ако се суди според анкетите, Велика Британија на 5 септември ќе добие нов премиер, поточно премиерка, а тоа е актуелната министерка за надворешни работи, Лиз Трас. Нејзиниот главен ривал, Риши Сунак, против кого води со 62 наспроти 38 отсто е на удар поради аферите на Борис Џонсон, во кои Сунак самиот учествувал. Трас има и друг адут, а тоа е дека таа му е кандидат-фаворит на Џонсон, пишува Нова.

Но, нејзините груби и отворени изјави за Путин и за Балканот ѝ го дадоа вниманието на јавноста. Посетувајќи го Сараево, Трас неодамна рече дека нејзината земја ќе се спротивстави на „малигното“ влијание на Русија во регионот.

– Мора да се запрат руските закани за враќање во темните денови – рече Трас, додавајќи дека руското мешање во внатрешните работи на БиХ е јасно видливо.

Таа најави посебен пакет финансиска поддршка за Западен Балкан од 100 милиони долари до 2025 година, кој има за цел да помогне во економскиот напредок, а со тоа и на стабилноста на регионот и предупреди на опасноста од војната во Украина.

Црната шубара и санкциите кон Кина

Трас беше позната и по тоа што денови пред да започне војната во Украина облече црна руска шубара и се сретна со својот колега Лавров да го разубедува да не напаѓа. Одговорот беше негативен, но нејзината појавност остави впечаток. Таа беше и една меѓу првите политичари од Западот кои јавно предложија еднакви санкции кон Кина, ако Кина одлучи да ја поддржи позицијата на Русија во војната.

Нема да му ласкаме на Путин

Кога неодамна Трас во ТВ-дебата со својот противник Сунак рече дека е време за одлучна борба со Путин, нешто силно тресна во позадина на студиото. Скандалот повторно предизвика внимание, иако овојпат тоа не беше нејзината силна изјава. Не толку силна како онаа од Сараево:

– Нема да им помогнеме (на Украинците) со ласкање на Путин – рече Трас во Сараево, додавајќи дека на Украина ѝ треба нов Маршалов план за реконструкција, со помош во оружје.

Таа го опиша обидот на Русија да го користи гладот ​​како оружје како ужасен и рече дека Путин мора да ја укине блокадата на извозот на жито од Украина и дека какво било укинување на санкциите против Русија или „ласкање што ќе го направи Путин посилен“ не доаѓа предвид.

Директорката во „Шел“ чиј идол е Маргарет Тачер

Елизабет Мари Трас е родена на 26 јули 1975 година. Се школувала на Универзитетот Оксфорд, а пред да учествува во политиката работела како комерцијална директорка во познатата нафтена и гасна компанија „Шел“.

Трас имаше повеќе функции во владата во изминатата деценија. И покрај тоа што гласала за останување на Велика Британија во Европската Унија, таа успеа да се позиционира меѓу пратениците како доверлива личност во периодот по Брегзит.

Беше вклучена во трговските преговори меѓу Обединетото Кралство и ЕУ по Брегзит и работеше на создавање нови врски за слободна трговија со други земји и е популарна меѓу членовите на Конзервативната партија.

Нејзин политички идол е Маргарет Тачер и тоа никогаш не го криела.