СОФИЈА ГО ПОВЛЕКУВА СВОЈОТ АМБАСАДОР ОД МАКЕДОНИЈА „Ангелов ќе остане надвор сè додека не видиме знаци на промена“
Во самиот предлог нема рокови, тие( во Македонија) може да не ги исполнат (обврските) со децении, што значи дека нема да почнат преговори, изјави Милков.
Министерот за надворешни работи на Бугарија Николај Милков попладнево изјави дека бугарскиот амбасадор Ангел Ангелов ќе остане надвор од Северна Македонија сè додека, како што рече, Софија не види знаци на промена.
Милков и Ангелов беа сослушани на Комисијата за надворешна политика. Во изјава за медиумите Милков рече дека „ако Северна Македонија продолжи да се однесува така возможно е повторно Бугарија да постави вето”.
– Македонија за да продолжи по својот европски пат мора да ги почитува преземените обврски во рамки на европскиот предлог. Нема потреба Бугарија да прави ништо, туку да обезбеди почитување на обврските што Македонија ги презеде. Во самиот предлог нема рокови, тие може да не ги исполнат со децении, што значи дека нема да почнат преговори – изјави Милков.
Бугарскиот министер за надворешни работи додаде дека Софија останува отворена за дијалог ако се разгледуваат проекти за заштита на Бугарите во Северна Македонија.
– Ако тоа не се случи можеме да ги стопираме сите други меѓувладини проекти – рече Милков.