СО ПРОСТАЧКИ ПЛАКАТИ ВАНДАЛИЗИРАН ДИГИТАЛНИОТ СПОМЕНИК НА ПРЛИЧЕВ За копуциве „арач лут без жал“ е малку!
Споменикот е високо реалистичен приказ на живописен аватар кој го претставува Прличев, синхронизиран со говор кој ги отелотворува стиховите и емоциите на поетот. За некои, сепак, тоа е само место за лепење плакати. Во случајов, виновниците лесно може да се пронајдат.
Врз виртуелниот споменик на Григор Прличев во Охрид некои „генијалци“ залепиле плакати за концертите на Владо Јаневски и на Црвена јабука.
Фотката ја објави познатиот новинар, охриѓанецот Богдан Илиевски, со коментар: „Ни тешки медикаменти не ја оправет работава. Едино Десингерица да почнит наместо со терлаци да ги акат погла со чекан.“
Дигиталниот паметен споменик, кој ги вкрстува вештачката интелигенција и виртуелната реалност во уникатно футуристичко искуство за граѓаните и посетителите на Охрид, беше промовиран лани.
Воскреснувањето на Григор Прличев преку користење на најновите технологии овозможува да ги спознаеме културата и технологијата, минатото и иднината, во непосредна интеракција со дигиталната свест на Вториот Хомер.
Иновативниот систем е изработен од страна на компанијата Сефиданис. Решението, покрај останатото, вклучува и технологија за препознавање на говор на македонскиот јазик, како и високо реалистичен приказ на живописен аватар кој го претставува Прличев, синхронизиран со говор кој ги отелотворува стиховите и емоциите на поетот.
За виртуелниот модел на ликот се користени оригинални фотографии, автентични скулптури со примена на напредни методи на машинска интелигенција за дигитална фотограметрија. Дигиталниот споменик е достапен за комуникација во текот на целиот ден и ноќта, лето и зима на плоштадот на уметноста Долна Порта.