СМРДЕА И КАНАЛИЗАЦИЈА КАЈ БИЛЈАНИНИ ИЗВОРИ Охрид СОС прашуваат до кога каналот кај Студенчишта ќе се поплавува?
Со еден дожд ги гледаме сите проектантски „успеси“ на изведувачите, којзнае колку пари добиле од општинската каса, односно од даночните обврзници, за ова фијаско кое ни се случува. Дали Општина Охрид ќе преземе нешто или ќе продолжи да биде статист кој ќе крева рамена?, напишале од здружението под сликата од каналот.
Смрдеа од канализација го зафати каналот Студенчишта во Охрид по синоќешните обилни дождови кај Билјанини извори. Тоа е местото каде се наоѓа и војската и паркираат дузина бродови, глисери и други пловни објекти. Здружението Охрид СОС на Фејсбук прашува до кога излеаната атмосферска и канализациона мрежа од поплавените улици ќе се влева во езерото.
„Веќе се навикнавме, над две децении, после секој обилен дожд да очекуваме поплавени улици, затнати одводи на улиците, излеана атмосферска и канализациона мрежа и сето тоа се влева во езерото. После вчерашниот дожд, кај каналот Студенчишта е регистриран и ваков призор. Пропратен со неподнослива смрдеа, како од канализација. Дали повторно преку оној див приклучок за кој неодамна споделивме и реагиравме да се санира истечена е неконтролирана количина фекална вода? До кога ова ќе биде глетката од Охрид? До кога ќе се толерира и премолчува загадувањето на Охридското Езеро? Со еден дожд ги гледаме сите проектантски „успеси“ на изведувачите, којзнае колку пари добиле од општинската каса, односно од даночните обврзници, за ова фијаско кое ни се случува. Дали Општина Охрид ќе преземе нешто или ќе продолжи да биде статист кој ќе крева рамена?“, напишале од здружението под сликата од каналот.