📽️ СКОПЈЕ ПО БУРАТА ШТО ПРЕДИЗВИКА ХАОС Ѓорѓиевски објави видео од последиците и најави интервенции во текот на ноќта
Градоначалникот на Скопје, Орце Ѓорѓиевски, објави видео од последиците од силното невреме што попладнево го зафати градот и информираше дека екипите на јавните претпријатија веднаш биле испратени на терен.
Силното невреме со бурни налети на ветер што попладнево го зафати Скопје предизвика бројни штети низ повеќе делови од градот, а градските служби веднаш излегоа на терен за расчистување на последиците.
Градоначалникот на Скопје, Орце Ѓорѓиевски, преку објава на социјалните мрежи сподели видео од состојбата по невремето и порача дека реакцијата на службите била брза и организирана.
– Природата не можеме да ја спречиме, но реагиравме брзо, организирано, навремено и одговорно – напиша Ѓорѓиевски.
Тој информираше дека екипите на градските јавни претпријатија веднаш биле мобилизирани, а паднатите дрвја и гранки започнале да се отстрануваат.
– Булеварите се проодни, а паднатите дрвја и гранки интензивно се расчистуваат. Ќе бидеме будни и на терен во текот на целата ноќ – порача градоначалникот.
Ѓорѓиевски упати порака до граѓаните дека институциите остануваат активни сè до целосно санирање на последиците.
– Скопје нема да остане само ниту во најтешките моменти – напиша тој.
Силниот ветер попладнево предизвика паднати дрвја, оштетени кровни конструкции, прекин на електрична енергија во делови од градот и материјални штети на повеќе локации. Надлежните служби продолжуваат со интервенции и проценка на состојбата.