Скопјaни добија втора тартан патека во Градскиот парк

Скопјaни од денеска имаат можност да се рекреираат на уште една тартан патека што е оформена околу големото езеро во Градскиот парк.

Патеката е долга 834 метри и е поставена кружно по должината на големото езеро во вториот дел од Градскиот парк. Во еден мал дел двете тартан патеки се преклопуваат. Кругот кој го формираат двете патеки заедно изнесува точно 1.000 метри.

– Граѓаните патеката ќе можат да ја користат и во текот на ноќта бидејќи се погриживме да ја осветлиме по целата должина со ново ЛЕД осветлување. Дополнително, околу патеката е поставена и соодветна урбана опрема и придружни содржини – инфо табли, чешми, клупи и корпи за џебен отпад – рече на промоцијата на патеката градоначалникот Петре Шилегов.

Тој додаде дека новата тартан патека поради сенките од околните дрвја кои ја штитат од сончевите зраци е поволна за користење и во летниот период кога паркот природно привлекува многу луѓе кои криејќи се од летните температури доаѓаат тука да прошетаат, одморат и да се рекреираат.

Пред две години Град Скопје ја изгради првата тартан патека, околу малото езеро, која е долга 534 метри.