СИТЕ ОБЈЕКТИ НА АРМ СЕ БЕЗБЕДНИ Нема опасност од ширење на пожарот на Криволак
Како што наведуваат од Министерството за одбрана и од ГШ, во моментот пожарот е со мал интензитет со линија на протегање од 700-800 метри и поради слабиот интензитет на ветрот нема зафатено поголема површина на западната страна на „Орлово брдо“.
Министерството за одбрана и Генералштабот на Армијата информираa дека попладнево со еден армиски хеликоптер МИ-8/17 и исфрлени пет тони вода, се интервенираше во локализирање на пожарот кој е присутен во околината на Армискиот полигон „Криволак“, поточно на неговиот краен источен дел во близина на месноста „Орлово брдо“.
Како што наведуваат од Министерството за одбрана и од ГШ, во моментот пожарот е со мал интензитет со линија на протегање од 700-800 метри и поради слабиот интензитет на ветрот нема зафатено поголема површина на западната страна на „Орлово брдо“.
Армиските и инфраструктурни објекти од особено значење се на безбедно растојание од 5-7 километри воздушна линија од локацијата на пожарот и тие согласно армиските процедури дополнително се обезбедени и со инженериско уредени безбедносни противпожарни појаси во потребна широчина согласно проценките.
Армискиот хеликоптер кој дејствуваше во координација со припадниците на Армијата од АП Криволак доколку има потреба ќе интервенира утре во раните утрински часови.
Во текот на денешниот ден во утринските часови со пилотите од воздухопловниот ВИНГ интервенирајќи непрекинато 3 часа со исфрлени 42 тони вода во атарот на населеното место Богданци, со што беше спречено да се префрли пожарот кон населени места и помогна истиот да се стави под контрола, стои во соопштението.
Непристапноста на теренот и можната опасност да експлодира неексплодирана муниција, што е можно да е заостаната од претходни вежби, е причина зошто не може да се пристапи кон гасење на пожарот од земја, изјави вечерва за МИА, м-р Илија Бојаровски од Центар за управување со кризи.
– Од командантот на полигонот сме информирани дека има мобилна екипа од полигонот Криволак, која го надгледува пожарот. Преку Центарот за управување со кризи немаат побарано ангажирање ниту на хеликоптер, ниту на дополнителни сили. Инаку, хеликоптерите имаат работна летечка температура што не дозволува да летаат на високи надворешни температури над 38 степени, а не летаат ноќе заради безбедносни причини. Тоа значи дека при високи надворешни температури при топло време и ноќе, не се дејствува со хеликоптерите на армијата – појасни Бојаровски.
Тој беше дециден дека пожарот се уште не е изгасен, но нема закана по населените места.