СИНДИКАТИТЕ СЕ ПРОТИВ TOA ШТО ГО БАРАА ВО ВРЕМЕТО НА СДСМ? Она што беше добро пред неколку месеци, веќе не е
Тоа што за ССМ беше добро до пред неколку месеци, сега веќе не е. ССМ се лицемерни и одат сами против себе, само за да исполнат партиска насока на СДСМ, обвини Валентин Манасиевски од ВМРО-ДПМНЕ велејќи дека претходно ССМ сами бараа минималната плата да се усогласува со растот на просечната плата и стапката на инфлација.
Сојузот на синдикатите на Македонија е против предлог кој бил договорен со претходната власт на СДСМ, обвини Валентин Манасиевски, член на Централниот комитет на ВМРО-ДПМНЕ.
Манасиевски тврди дека за ССМ веќе не е добро „тоа што било добро пред неколку месеци“.
„ССМ против ССМ, сега се против решението за минималната плата кое самите го бараа додека власт беше СДСМ.
ССМ сами бараа минималната плата да се усогласува со растот на просечната плата и стапката на инфлација, а тоа се пресметува 50 проценти од порастот на просечната плата и 50 проценти од процентот на индексот на живот, со дополнителен услов, уделот на минималната во просечната плата задолжително да биде над 57 проценти.
ССМ ова го договори и го презентираше како историски успех, ВМРО-ДПМНЕ го почитува тоа што синдикатите го договориле со работодавачите.
Но каде е тука проблемот?
Сега не е повеќе СДСМ на власт, тие кои го поставија раководството во ССМ, на чело со Трендафилов, и синдикатот сега се користи за пресметка и политичка битка.
Тоа што за ССМ беше добро до пред неколку месеци, сега веќе не е.
ССМ се лицемерни и одат сами против себе, само за да исполнат партиска насока на СДСМ“, соопшти Манасиевски од партиската говорница.