ШТО СЕ СЛУЧУВА СО ОБЕЗБЕДУВАЊЕТО НА ТРАМП? Толку ли е лесно да се загрози безбедноста на американскиот претседател?

Иако го штити своевидна мала армија агенти на Тајната служба, што го прави веројатно најобезбедениот човек на светот, обезбедувањето на претседателот Доналд Трамп очигледно воопшто не е лесна задача. Последниот сериозен инцидент е само еден во низата и сè повеќе отвора прашања за безбедноста на американскиот претседател.

Најнапред се случи неуспешниот атентат во Батлер, во Пенсилванија, во текот на летото 2024 година, кога куршум го закачи по увото.

Само 64 дена подоцна, Трамп повторно беше мета на потенцијален напаѓач, овојпат додека играше голф на терен на Флорида.

А сега, само неколку часа откако истрели ја прекинаа свечената атмосфера на вечерата на дописниците од Белата куќа во хотелот „Хилтон“ во американската престолнина, безбедноста на Доналд Трамп повторно е под лупа.

Иако мотивот и точната цел на осомничениот напаѓач, 31-годишниот Кол Томас Ален, сè уште не се јасни, се поставуваат сè повеќе прашања како вооружен маж воопшто успеал да се најде толку блиску до претседателот.

„Проверките не беа особено засилени“

Едно од клучните прашања се однесува на нивото на безбедносните проверки во хотелот кој бил домаќин на некои од највлијателните политичари, дипломати и новинари во Вашингтон.

Гери О’Донохју, главен дописник за Северна Америка на Би-Би-Си, кој присуствувал на вечерата, изјави дека улиците околу хотелот „Вашингтон Хилтон“ со часови биле затворени, но дека обезбедувањето внатре во објектот „не било особено засилено“.

Снимка од безбедносни камери, која Трамп ја објави на социјалните мрежи, го прикажува осомничениот како се пробива низ безбедносен пункт на Тајната служба, поставен на кат над свечената сала.

Властите соопштија дека кај себе имал сачмарка, пиштол и повеќе ножеви. Пред да биде совладан, напаѓачот разменил оган со припадници на обезбедувањето.

Мета му бил и самиот Трамп

Водителот на Си-Ен-Ен, Вулф Блицер, изјави во програмата дека видел како осомничениот пука повеќепати, користејќи, како што рече, „многу, многу сериозно оружје“.

Претседателот подоцна објави фотографија од маж без маица како лежи на подот, со рацете врзани зад грб, додека околу него стојат агенти на Тајната служба.

Вршителот на должноста државен обвинител на САД, Тод Бланш, изјави за Ен-Би-Си дека сè укажува оти мета на нападот била администрацијата, „веројатно и самиот претседател“.

Полицијата соопшти дека Кол Томас Ален бил гостин во хотелот „Вашингтон Хилтон“, кој редовно работел и покрај тоа што во истиот објект престојувале дел од најмоќните луѓе во светот.

 

„Само една безбедносна проверка и внатре сте“

Поранешниот британски амбасадор во Вашингтон, Ким Дарок, кој претходно присуствувал на вакви вечери, остро ја критикуваше поставеноста на обезбедувањето.
„Ако сте гостин во хотелот и имате лоша намера да влезете на оваа вечера, постоеше само една безбедносна пречка што требаше да ја поминете… и веќе сте внатре во салата“, изјави тој за Би-Би-Си.

И самиот Трамп подоцна изјави дека „Хилтон“ „не е особено безбедна зграда“, додавајќи дека инцидентот уште еднаш покажал колку е важна новата балска сала на Белата куќа, која е во изградба, но и предмет на судски спор.

– Тоа е всушност поголема сала и многу побезбедна. Отпорна е на дронови. Има панцирно стакло. Нам ни е потребна таа сала – рече Трамп.

Во исто време, претседателот ја пофали „храброста“ на припадниците на Тајната служба, кои него и потпретседателот Џеј-Ди Венс ги извлекле од бината, нагласувајќи дека „завршиле одлична работа“.

Мерките мора да се засилат

Експертите за безбедност посочуваат дека фактот што напаѓачот никогаш не успеал да влезе во самата балска сала говори дека безбедносните мерки сепак функционирале.

Поранешниот специјален агент на Федералното истражно биро, Џеф Кригер, изјави за Би-Би-Си дека тоа е „токму она за што е обучена Тајната служба“.

Кога се слушнале истрелите, агентите веднаш се „собрале околу претседателот“, создавајќи своевиден „жив штит“, објасни тој.

И поранешниот агент на Тајната служба, Бери Донадио, изјави дека се чини оти на настанот „не недостасувале агенти, полицајци и обезбедување“.

Говорејќи за можни идни промени, дел од експертите оценуваат дека јавните настапи на Трамп во иднина би требало да бидат обезбедени со уште построги мерки, вклучително и поширок безбедносен периметар.