ШТО МУ ВЕТИЛ КОВАЧЕВСКИ НА АХМЕТИ АКО СДСМ ПОБЕДИ НА ИЗБОРИТЕ? Не е случаен предлогот на ДУИ шефот на државата да се бира во Собрание
Лидерот на ДУИ се заканува дека неговата партија нема да коалицира со победникот на парламентарните избори за формирање на идната влада, но тоа го вели сега во пресрет на изборите. Работите ќе се сменат по завршувањето на изборите во мај, ќе видите. Тогаш повторно сите ќе трчаат да формираат коалиција за да влезат во новата влада, коментира за Плусинфо поранешниот министер Џевдет Хајредини.
„Предлогот на Али Ахмети да се бира шеф на државата со двотретинско мнозинство во Собранието со сигурност ќе се реализира доколку СДСМ победи на претстојните парламентарни избори, бидејќи очигледно е дека се работи за класичен политички договор помеѓу коалициските партнери“.
Вака политичките аналитичари го коментираат вчерашното јавно излагање на лидерот на ДУИ, кој отворено се закани дека неговата партија нема да учествува во процесот на формирање на идната влада доколку не биде прифатен предлогот идните претседатели на државата да се бираат во Парламентот со двотретинско мнозинство и со Бадентер, а истовремено да се назначува и заменик-претседател.
Некои експерти, пак, проценуваат дека Ахмети е во многу тешка политичка ситуација и дека се обидува преку вакви небулозни предлози да ги придобие симпатиите на албанските гласачи во Македонија.
Политички договор
Ова е класичен политички договор помеѓу СДСМ и ДУИ, бидејќи лидерот на ДУИ е свесен дека Албанците никогаш нема да можат да добијат претседател на државата преку избори.
Измеќарскиот, односно потчинетиот однос на СДСМ кон ДУИ ја донесе земјава на ова ниво.
– Да се биде претседател Албанец на Македонија може да се случи само преку политички договор, па сѐ додека постојат изборите и сѐ додека македонскиот народ во земјава е мнозински, таквото сценарио е невозможно. Впрочем, такво нешто ни се случува баш во моментов со техничкиот премиер Талат Џафери, кој дојде на функција со политички договор. На Ахмети му се јасни работите и затоа тој инсистира да се промени процедурата и да се воведе избор на шеф на државата во Собранието. И за тоа сигурно разговарал и веројатно се договорил со коалицискиот партнер Димитар Ковачевски, па доколку СДСМ евентуално победи на изборите, тогаш неговиот предлог дефинитивно ќе се реализира. Измеќарскиот, односно потчинетиот однос на СДСМ кон ДУИ ја донесе земјава на ова ниво. Огромната желба на СДСМ да биде на власт ќе ги распродаде сите интереси поврзани со Македонија, па ако можеа да ги променат знамето и името на државата, нема воопшто да им претставува проблем да променат еден куп закони за да му удоволат на Ахмети – објаснува Пекевски.
ВМРО-ДПМНЕ дефинитивно ќе ја формира идната влада и сметам дека веќе има партнер во албанскиот опозициски блок, додава аналитичарот.
Пратеникот и лидер на Демократски сојуз, Павле Трајанов, смета дека Али Ахмети со ваквите предлози упорно форсира поделби во државата.
– Ова е доказ дека ДУИ и Али Ахмети форсираат поделби во државата и бараат сѐ да биде врз основа на политички договор или пазар. Јас го застапувам граѓанскиот концепт. Претседателот на државата го бираат граѓаните, независно од етничката припадност. Воопшто не е важно дали тој е Македонец, Албанец, Турчин, Србин или Бошњак. Ние треба да спроведеме темелни уставни реформи, ама овој Бадентер и Балансер треба да останат зад нас. Токму таа партизација ја вовлече земјава во тешка криза. Ние и сега сме во колапс како држава. Затоа не треба да се сфаќа премногу сериозно предлогот на ДУИ, бидејќи Али Ахмети во моментов е сосема неважен политичар и тој не може и не смее да уценува. Ние му даваме преголемо значење, бидејќи со 10-12 пратенци тој има претседател на Влада и 8 министри. Тоа е спротивно на уставните начела за соодветна и правична застапеност на сите етнички заедници. Затоа, треба веднаш да се отфрли таа негова иницијатива и треба јасно и гласно да му се каже дека не доаѓа предвид претседател на државата да се бира во Собрание. Уцените се неприфатливи. Доволно беа закани со насилство, со вадење чизми од таван, тоа време веќе помина – објаснува Трајанов.
Невозможна мисија
Политичкиот аналитичар и поранешен министер за финансии Џевдет Хајредини вели дека Ахмети е во многу тешка ситуација, па затоа се обидува преку вакви небулозни предлози да ги придобие симпатиите на албанските гласачи во Македонија.
– Лидерот на ДУИ сака да се наметне како политички фактор во Македонија, но всушност неговото време помина. Тој многу добро знае дека нема никогаш да се формира двотретинско мнозинство во Собранието за да се промени Уставот со цел да се избере шеф на државата. Тоа значи дека Ахмети вчера не кажа ништо важно, ама проблемот е во тоа што новинарите и медиумите му даваат големо значење на неговиот настап. На овој начин само му го поправате рејтингот, а всушност треба целосно да го игнорирате – вели Хајредини за Плусинфо.
Тој смета дека уцената на Ахмети нема да важи по изборите.
Али Ахмети многу добро знае дека нема никогаш да се формира двотретинско мнозинство во Собранието за да се промени Уставот со цел да се избере шеф на државата.
– Ахмети се заканува дека неговата партија нема да коалицира со победникот на парламентарните избори за формирање на идната влада, но тоа го вели сега во пресрет на изборите. Работите ќе се сменат по завршувањето на изборите во мај, ќе видите. Тогаш повторно сите ќе трчаат да формираат коалиција за да влезат во новата Влада. Од ДУИ веќе и го најавија тоа сценарио, бидејќи министерот Артан Груби деновиве изјави дека не гледа проблем неговата партија да коалицира со ВМРО-ДПМНЕ по изборите – објаснува Хајредини.
Професорката по уставно право и поранешна членка на Венециската комисија, Тања Каракамишева, пак, очекува од македонските партии да ја отфрлат уцената од партиите на Албанците – и од власта, и од опозицијата – за коалицирање во Влада само ако во иднина претседателот на државата се избира во Собранието, а не на непосредни избори, како досега.
– По сложното фрлање ракавица во форма на уцена од страна на албанските партии, очекувам сложно враќање на ударот од страна на македонските партии дека нема да толерираат ретроградни демократски предлози спротивни на европските вредности. Јасно е дека уцената е повик за бојкот во вториот круг – оценува Каракамишева.
АХМЕТИ БАРА ЗАМЕНИК ШЕФ НА ДРЖАВАТА Потврдена претседателската кандидатура на Османи