Шахпаска: Беспредметно е кога децата одат во градинка, родителите да седат дома

Одлуката на Владата за враќање на родителите на децата од нула до шест годишна возраст на работа од 23 септември е логична и очекувана, со оглед на тоа што градинките и Центрите за ран детски развој од 9 септември се отворени и имаат капацитет да ги примат децата, изјави денеска министерката за труд и социјална политика Јагода Шахпаска.

Таа рече дека согласно Протоколот градинките во државата имаат капацитет да примат 19.000 деца, а интерес досега покажале родители на 14.555 деца.

-Притоа, морам да нагласам, дека и дел од родителите што веќе ги пријавија децата, изминатата недела не ги носеа во градинка. Од тие причини Министерството за труд и социјална политика достави допис до градинките да ги проверат родителите и да утврдат дали тие деца ќе доаѓаат во градинка. Дополнително, приоритет за згрижување во градинка ќе имаат децата на самохраните родители и децата на двајца вработени родители. Од тие причини потребата на родителите да не одат на работа е беспредметна. Простор во градинките има, Протоколот се почитуваа целосно, Министерството и Владата внимателно ја следат работата и затоа работниот процес мора целосно да се врати во нормала – рече Шахпаска.

Шахпаска оцени дека со отворањето на градинките и користењето на продолжено породилно боледување ја губи смислата.

-Тие родители ги чуваа своите дечиња затоа што градинките не работеа. Градинките веќе се отворени и затоа на вчерашната владина седница беше донесена одлука родилките кои ја користеа мерката за продолжено породилно отсуство да се вратат дома –  додаде Шахпаска.

Таа нагласи и дека се  следат состојбите и сите одлуки се носат врз основа на темелна анализа, со вклучување на повеќе ресорни министерства, со сите чинители на општеството.

– Државата мора да функционира, системот треба да работи, економијата мора да се движи –  додаде Шахпаска