СЕВЕРЕН ТЕК БИ МОЖЕЛ ДА ‘РЃОСА Ако брзо не се поправи штетата, морската сол ќе ја заврши својата работа
Веројатно е дека Русија се обидува да предизвика неизвесност меѓу европското население и наводно да ја демонстрира својата способност да ја напаѓа критичната инфраструктура, рече германскиот пратеник Родерих Кизеветер, обвинувајќи ја Москва дека спроведува државен тероризам.
Непоправлива можеби е штетата која им беше нанесена на цевките од Северен тек 1 и 2, објави вчера германски Тагесшпигел, цитирајќи владини кругови. Доколку штетата не се санира доволно брзо, премногу солена морска вода би можела да навлезе во цевките што лежат на дното на Балтичкото Море и неповратно да ги кородира, предупредија германските власти, пренесува РТ.
Медиумот не спомнува какви било планови за поправка ниту од страна на Русија, ниту од Германија.
„Данска во средата соопшти дека нејзините власти ќе можат да започнат истрага за ова прашање не порано од една или две недели поради „безбедносни грижи“, пишува Тагесшпигел.
Група високи германски пратеници веќе го вперија прстот кон Москва за инцидентот.
– Нападот врз инфраструктурата за снабдување со енергија има за цел да шири страв и ужас – рече Родерих Кизеветер, германски пратеник и портпарол за спречување кризи на парламентарната група на Конзервативната унија, за медиумската група РНД.
– Затоа, веројатно е дека Русија се обидува … да предизвика неизвесност меѓу европското население и наводно да ја демонстрира својата способност да ја напаѓа критичната инфраструктура – додаде тој, обвинувајќи ја Москва дека спроведува државен тероризам.
Шефицата на Одборот за одбрана на германскиот парламент, Мари-Агнес Штрак-Цимерман, изјави за новинарите дека „не може да се исклучи дека [таквите напади] ќе бидат насочени од Русија со цел да ги разнишаат нашите пазари“. Таа, исто така, ја искористи приликата да ги повика Германија и ЕУ да се „ослободат“ од „зависноста од руските суровини што е можно побрзо“.