СЕКОЈ ДЕН БЕСПЛАТЕН ЈАВЕН ПРЕВОЗ ЗА ПЕНЗИОНЕРИТЕ Шилегов најави и бесплатен медицински транспорт за повозрасните
Градиме издигнат булевар на 9 метри, со кружен тек во ридот кај касарната, со којшто овозможуваме анулирање на семафорската сигнализација и движење без застој на сите видови сообраќај, рече Шилегов.
Изминативе 4 години на Карпош му посветивме големо внимание, истакна кандидатот на СДСМ и коалицијата за градоначалник на Град Скопје Петре Шилегов во рамките на изборниот караван „Најдоброто за мојата општина“.
Од реализираните проекти во патната инфраструктура, Шилегов ги издвои реконструкцијата на булеварите Партизанска од 8 септември до кружниот тек во Ѓорче Петров и 8 септември од Илинденска до Скупи, а целосно се реконструирани улиците Лондонска, Љубљанска, Московска, Брадфордска, Никола Парапунов и Ацо Шопов.
– Ја градиме Клучката на Момин Поток, на раскрсницата каде по огромни гужви поминуваат 25 до 30.000 возила дневно – истакна Шилегов.
Тој прецизираше дека раскрсницата што спојува четири општини, го добива најмодерното и најсофтицираното сообраќајно решение било кога изработено во урбана средина во Македонија.
– Градиме издигнат булевар на 9 метри, со кружен тек во ридот кај касарната, со којшто овозможуваме анулирање на семафорската сигнализација и движење без застој на сите видови сообраќај, а таму за прв пат ќе изградиме велосипедски мост, вело патеки мора да има како составен дел од сите идни сообраќајни решенија во градот – најави Шилегов.
Паркот во Карпош 4 наредната година станува реалност за карпошани, ова ќе биде третиот дел од Градскиот парк и ќе го споиме градскиот парк до изворите на Лепенец, најави Шилегов, додавајќи дека, во Карпош се подигнати над 43.000 метри квадратни нови и реконструирани паркови површини, со засадени над 2,300 садници, доби и два нови урбани скверови со повеќе зеленило и содржини за одмор и релаксација, еден кај објектот на Пожарната во Тафталиџе, а другиот кај гимназијата Орце Николов.
Тој најави бесплатен јавен градски превоз за сите пензионери во Скопје секој ден во неделата, а не само во вторник и петок, со што се запираат гужвите во работните денови во градските автобуси за луѓето кои одат на работа или на училиште.
– Исто така овозможуваме бесплатен медицински транспорт за лицата во трето доба и лицата со попреченост до здравствените институции во градот. За поголема самостојност и независно функционирање, обезбедуваме ефикасен, безбеден и бесплатен транспорт за нив – рече Шилегов и најави и бесплатен јавен градски превоз и за лицата со ретки болести.