СДСМ нема да ја поддржи интерпелацијата – чека Џафери јавно да признае дека го прекршил Уставот и да вети дека нема да се повтори

Талат Џафери нема да биде сменет од функцијата претседател на Собранието иако го прекрши Уставот и во Европскиот парламент наместо на македонски, тој се обрати на албански јазик.

Висок функционер од СДСМ за Плусинфо вели дека нивните пратеници нема да ја поддржат интерпелацијата која вчера ја поднесоа ВМРО-ДПМНЕ и Левица против првиот парламентарец, иако е недозволиво тоа што Џафери го прекршил Уставот.

И додека Џафери веќе неколку дена молчи по скандалот во Брисел, од партијата на Зоран Заев очекуваат претседателот на Парламентот јавно да признае дека згрешил.

Против интерпелацијата најверојатно ќе биде и целиот албански парламентарен блок во Собранието.

– Недозволиво е претседател на Собрание во Европскиот парламент да говори на албански јазик. Уставот е прецизен дека во меѓународна употреба е македонскиот јазик. Јасно е дека Џафери го прекрши Уставот, тоа и Владата веќе го кажа. Но сепак, претседател на Собранието е втора функција во државата и доколку тој биде сменет ќе се отвори Пандорината кутија за смена на првите луѓе во државата, оти сите грешат. Но Џафери не треба да молчи. Важно е тој да излезе во јавноста, да каже дека згрешил и дека тоа повеќе нема да се повтори – вели функционерот од СДСМ за Плусинфо.

Функционерот потенцира дека е јасно дека Џафери не го почитувал Уставот, бидејќи албанскиот јазик е во службена употреба во државава, но не и за меѓународна употреба, дека ова е Македонија а, не Албанија, каде албанскиот јазик е официјален за сите употреби.

– Нејасно е што доби или постигна со тоа Џафери, нека излезе и нека каже – вели функционерот.

Интерпелацијата на Џафери нема да добие поддршка ниту од парламентарните партии на Албанците. Иако потврдуваат дека само македонскиот јазик е во меѓународна употреба, ниту владејачките ниту опозициските партии на Албанците нема да гласаат Џафери да биде разрешен од функцијата претседател на Собранието, со образложение дека тој зборувал на еден од службените јазици во државава.

И додека ДУИ како и Џафери молчат и досега јавно не се изјаснија за скандалот на претседателот на Собранието, од опозициската Алијанса за Албанците велат дека имаат многу забелешки за работата на претседателот на Парламентот, но дека забелешките наведени во интерпелацијата од ВМРО-ДПМНЕ и од Левица нема да ги поддржат.

– Нашите забелешки се дека Џафери не се залага доволно за употребата на албанскиот јазик во Собранието. Доцнат преводите од стручните служби, албанскиот јазик во Парламентот се употребува како преведен јазик, во службите нема вработен Албанец за да ги прима амандманите. Се соочуваме со апсурдна ситуација, јас како пратеник Албанец кога поднесувам амандман службите не го примаат на албански јазик, па прво мора од албански да го преведам на македонски, па службите потоа повторно го преведуваат на албански јазик. Не можам како пратеник Албанец материјалите да ги доставам само на албански јазик. Постојано се крши Уставот, така што за ова нема да ја поддржиме интерпелацијата, но на седницата ќе ги кажеме нашите забелешки за работата на Џафери – ни изјави Халил Снопче, пратеник од Алијанса за Албанците.

И од Алтернатива велат дека нема да ја поддржат интерпелацијата за Џафери.

– Во принцип секогаш сме против мнозинството, но овој пат причината за интерпелацијата нема да ја поддржиме. Колку и да згрешил, не направил кардинална грешка за тоа да биде причината за негова смена. Тој зборувал на еден од службените јазици во државава. Уставот е прекршен во 100 други работи. Не сметаме дека таа причина е толку голема за да се издигне на ниво на скандал – велат од Алтернатива.

ВМРО-ДПМНЕ и Левица бараат интерпелација на Џафери бидејќи во Европскиот парламент Џафери зборуваше на албански јазик, го заборави Уставот, заборави дека во амандманот 5 на членот 7, во ставот 1 пишува дека на целата територија и во меѓународните односи службен јазик е македоснкиот и неговото кирилско писмо.

– Џафери не отиде во Европскиот парламент како граѓанинот Џафери, туку како претседател на Собранието и тоа исто така можеби пред да замине требаше да го прочита членот 2, став 2 од Законот за употреба на македонскиот јазик според кој, употребата на македонскиот јазик како службен јазик е право и должност на сите граѓани на Република Македонија, а замислете што значи оваа одредба за претседател на Собранието. Затоа што тогаш тој е должен да се држи до Уставот и законите – рече вчера пратеничката на ВМРО-ДПМНЕ, Гордана Силјановска Давкова.

Одговорност од Џафери се бара и поради тоа што сите материјали вклучувајќи ги и законите пратениците ги добиваат двојазично, односно на македонски и на албански јазик и поради гласањето во „скафандери“, кога според ВМРО-ДПМНЕ бил прекршен протоколот и дополнението на протоколот и било доведено во опасност здравјето на сите пратеници и на сите вработени во Собранието.