СДСМ ДА СИ ЌУТИ ЗА РЕК БИТОЛА Го оставија комбинатот без јаглен, а цената на производство на струја е дуплирана

СДСМ најмалку што е потребно во моментов е да ја коментира енергетската состојба во земјава, реагира денеска АД ЕСМ на соопштението на опозициската партија која обвини дека трите блока на РЕК Битола не работат.

„Дереџето во кое се наоѓа севкупниот енергетски систем денеска, вклучувајќи ги актуелните состојби во РЕК Битола е резултат токму на работењето на нивните менаџерски кадри поставени од претходните влади на СДСМ, кои немале умешност, ниту одговорност за одржување на производните капацитети. Наспроти тоа, покажале целосна негрижа за електроенергетскиот систем, за што зборува и неодговорното однесување кон државните производни капацитети и природните ресурси, како јагленот и количините на вода во хидроакумулациите“, соопшти ЕСМ.

Кога СДСМ зборува дека РЕК Битола не работел, се додава во реакцијата, да го потсетиме дека токму до пред неколку недели нивни кадри управуваа со најголемиот енергетски комбинат и тие имале обврска да се однесуваат професионално до последниот ден кога биле на одговорни позиции и да ги подготват капацитетите за претстојната грејна сезона.

Од ЕСМ додаваат дека е долга е листата што сè затекнаа новите раководства на АД ЕСМ и РЕК Битола.

„Уништени и нестручно експлоатирани рудници, оставени без откривки на јаглен од кои може да се обезбеди континуиран и безбеден ископ за потребите на термоблоковите за стабилно производство на РЕК Битола. Нелогично долги застои на клучните машини за ископ на јаловина и јаглен. Лошо изведени, незапочнати или ненавремено завршени ремонти на термоблоковите. За само две години од 2022 до првата половина на 2024 година „успеале“ двојно да ја зголемат производната цена на електричната енергија од РЕК Битола, сега на неверојатни 133 евра за мегават-час. Неодговорно управување со опремата на АД ЕСМ. Несоодветни вработувања и прераспределување на стручни лица на неадекватни позиции“, набројува ЕСМ во реакцијата.

Потрошени се милиони евра за набавка на јаглен со лош квалитет, се додава, кој е несоодветен за употреба во термоелектраните и со специфики кои се во спротивност со пропишаните за работа на термоцентралите, поради кој е направена огромна штета врз еден од термоблоковите, како и загадување на животната средина

„Склучувале прескапи договори за набавка на јаглен. За седум години на власт не е изграден ниту еден државен капацитет за производство на електрична енергија. АД ЕСМ е оставен со огромна финансиска дупка“, се додава во реакцијата.

Токму купувањето на електрична енергија на слободниот пазар е последица исклучиво на нивното нестручно и дилетантско однесување за лошата состојба во рудниците, термоблоковите и празните хидроакумулации во АД ЕСМ, потенцираат од ЕСМ.

„Затоа очекуваме да следи одговорност за нивните постапки“, се вели во реакцијата на Елекрани на Македонија.

СДСМ денеска соопшти дека сите три блока од ноќеска на полноќ се надвор од функција, а за тоа ја обвини актуелната власт.

„Божиновска и владата на Мицкоски и ВМРО-ДПМНЕ се неспособни да менаџираат со енергетскиот систем во земјата. Наместо да го зголеми производството на струја од домашни капацитети, Мицкоски и ВМРО-ДПМНЕ го намалија. Владата во моментов прави огромен увоз на скапа струја заради нефункционирањето на РЕК Битола, што предизвикува огромни трошоци за државата и граѓаните. Трошоците за купување струја од берзата се огромни и тоа е врз грбот на граѓаните и државата, додека во исто време влијае сметките кои граѓаните ги плаќаат за електрична енергија постојано да бидат високи“, соопшти СДСМ.