СДСМ ЈА ПРИФАТИ ОСТАВКАТА НА ЗОРАН ЗАЕВ Новиот лидер ќе се избере на 12 декември
Најверојатен кандидат за иден претседател на СДСМ, што треба да се избере на непосредни избори, е актуелниот заменик министер за финансии Димитар Ковачевски.
Извршниот и Централниот одбор на СДСМ, синоќа и рано утрово по полноќ, ја прифатиле оставката на претседателот на СДСМ, Зоран Заев.
Централниот одбор на СДСМ ја констатирал поднесената оставка на претседателот Заев, објави портпаролката на СДСМ Богданка Кузевска.
Од денеска тече рокот од 7 дена за пријавување на кандидатите за нов претседател, кои исполнуваат услови според Статутот на партијата.
Новиот претседател на СДСМ ќе се избере на 12 декември, на непосредни избори.
Најверојатен кандидат за иден претседател на СДСМ е актуелниот заменик министер за финансии Димитар Ковачевски. Портпаролката на СДСМ КУзевска не потврди дека Заев го предложил Ковачевски за негов наследник, но повеќе медиуми од свои извори во раководството на партијата тоа го дознаа.
– Конкретно, станува збор за коментар за квалитет на човек, профил на човек кој може да носи државнички одлуки и ја поддржува европската иднина на земјата – рече Кузевска.
Заев информирал дека парламентарното мнозинство е стабилно и дека во моментов има 61 пратеник. Најавено е дека новиот претседател на СДСМ ќе биде и мандатар за состав на новата влада, во која, според синоќешната одлука на Централниот одбор, има простор и за партијата Алтернатива на Африм Гаши.
Кузеска рече дека Заев останува активен член на СДСМ.