САД СО НОВИ ЦАРИНИ ОД 33% ЗА МАКЕДОНИЈА На списокот на Трамп се најде и нашата земја
Останува да се види како Македонија ќе одговори на новите царински давачки и какво влијание ова ќе има врз трговијата меѓу двете земји.
САД воведуваат нови реципрочни тарифи, а на листата на претседателот Доналд Трамп се најде и Македонија, за која ќе се применува царина од 33%. Оваа одлука беше објавена на настан во Белата куќа, каде Трамп ја претстави својата стратегија за заштита на американската економија.
– Конечно ги ставаме Американците на прво место – изјави Трамп, истакнувајќи дека трговските дефицити повеќе не се само економски проблем, туку национална вонредна состојба.
Претседателот на САД држеше табла со детални податоци за тарифите што неговата администрација ги воведува кон одредени земји. Според податоците, стапките се движат од 10% до 49%, а Македонија се најде во групата земји со значителни давачки – 33%.
Инаку, размената на Македонија со САД лани изнесувала нешто над 314 милиони долари, наспроти 320,7 милиони долари во 2023 година, што значи била помала за 2,1 отсто, покажуваат податоците на Државниот завод за статистика.
Притоа, извозот од Македонија во САД лани достигнал 118,2 милиони долари, што е за 2,2 пати (220 насто) повеќе од претходната 2023 година кога бил 53,6 милиони долари. Истовремено, лани од САД биле увезени производи за 195,9 милиони долари, за 26,6 отсто помалку од 2023 година кога увозот во Македонија од САД бил 267 милиони долари.
Податоците од американскиот Стејт департмент, пак, покажуваат дека „електричните машини и опремата на САД беа особено привлечни за увозниците во Северна Македонија. Главниот извоз во САД е тутун, облека, железо и челик“, стои на интернет страницата на Стејт департментот.
— The White House (@WhiteHouse) April 2, 2025
– Во многу случаи, пријателот е полош од непријателот кога станува збор за трговијата – изјави Трамп, нагласувајќи дека САД долго време субвенционирале многу економии, вклучувајќи ги и традиционалните трговски партнери како Канада и Мексико.
Иако Трамп најави дека тарифите ќе бидат реципрочни, односно ќе ги одразуваат трговските политики на другите земји, тој сепак потенцираше: „Ова не е целосно реципрочно, тоа е љубезно реципрочно“.
Од регионот, Србија е погодена со највисока стапка од 37%, а Босна и Херцеговина со 35%. На стоките увезени во САД од Косово е воведена царина од 10%, исто како и за Албанија.
Останува да се види како Македонија ќе одговори на новите царински давачки и какво влијание ова ќе има врз трговијата меѓу двете земји.