САД И РУСИЈА ПРЕГОВАРААТ ВО РИЈАД ЗА НИВНАТА ТРГОВИЈА Се очекува брз напредок во економските разговори со Вашингтон

Напредок во преговорите меѓу Русија и САД за економските прашања е можен во следните 2 до 3 месеци, изјави денеска директорот на Рускиот фонд за директни инвестиции (РДИФ), Кирил Дмитриев, кој учествува на руско-американските преговори во Ријад, пренесе ТАСС.

• 📽 ПОЧНАА ПРЕГОВОРИТЕ ВО РИЈАД БЕЗ УЧЕСТВО НА КИЕВ Ќе се водат тешки разговори за Украина

Русија, која е подложена на тешки западни санкции поради инвазијата врз Украина, изрази очекување за „брз напредок“ во економските разговори со САД што започнаа денеска во Саудиска Арабија.

– Не можеме да откриеме детали, но значаен дел од преговорите се однесува на економијата. Политичките теми секако се присутни, но мојот фокус е инвестиционо-економскиот дел. Имаме повеќе предлози, што ги разгледуваат американските колеги, и верувам дека може да има напредок во наредните 2 до 3 месеци – изјави Дмитриев.

Пред средбата меѓу руските и американските високи претставници, Дмитриев се сретна со претставници на САД за можноста за обновување на економската соработка.

Во интервју за Си-Ен-Ен, тој ги пофали претставниците на администрацијата на Доналд Трамп како одлични преговарачи.

– Мислам дека претседателот Трамп е исклучително добар во решавање на проблеми – рече тој.

Дмитриев негираше дека целта на Москва е укинување на санкциите, нагласувајќи дека „изградбата на мостови меѓу САД и Русија е од клучно значење за светот“.

РУСИЈА НЕМА ДА ЈА СПРЕЧИ УКРАИНА ДА ВЛЕЗЕ ВО ЕУ Едно е влез во НАТО, а друго е влез во Европската Унија, потенцира Песков