САД ГО СТАВИЈА МЕРКО НА ЦРНА ЛИСТА, А ДРЖАВАТА НА СТОЛБОТ НА СРАМОТ! Фрчат реакции од сите страни, само државните институции во црна земја се загледаа

Не престанува лавината реакции од јавноста, медиумите, политичките партии и јавни личности по објавената вест дека Рамиз Мерко, градоначалник на Струга во четири мандати, истакнат функционер на ДУИ, поранешен пратеник, министер без ресор задолжен за странски инвестиции во владата на Зоран Заев, од вчера е на црната листа на САД, со одлука на Стејт департментот.

Реагираат сите, но не и најповиканите, Обвинителството, Владата, судовите, финансиската полиција, Министерството за локална самоуправа. Се поставува прашањето како сите овие институции со години го толерирале однесувањето на Рамиз Мерко, и како тоа Стејт департментот повеќе знае за корумпираноста на овдешните високи политичари од домашните институции.

Грковска чека реакции од судските органи

Вицепремиерката Славица Грковска, која е задолжена за политики за добро владеење и борба со високата корупција, се огласи на Фејсбук. Таа очекува реакција од домашните правосудни органи откако САД вчера го прогласија струшкиот градоначалник Рамиз Мерко за „персона нон грата“ поради неговата вмешаност во значителна корупција.

„Јасните пораки и конкретните чекори кои ги преземаат нашите меѓународни сојузници во борбата со корупцијата мора да бидат соодветно разбрани од домашните правосудни органи. Бидејќи нивната основна улога е да обезбедат еднаквост на граѓаните пред законот и да испорачуваат ефективна и неселективна правда“ – напиша вицепремиерката Грковска на Фејсбук.

ДУИ прво ќе состанчи па ќе гради став

Министерот за образование и наука и висок функционер на ДУИ Јетон Шаќири истакна дека ДУИ е политичка партија која „отсекогаш била за ветинг за сите функционери“. Тој ова го рече одговарајќи на новинарско прашање во врска со вчерашното прогласување на градоначалникот на Струга Рамиз Мерко за непожелна личност за влез во САД.

Шаќири информираше дека ќе има официјален став од партијата и за политички прашања новинарите ги упати да се обратат до партијата. Интересно е што министерот Шаќири и самиот дипломирал на Мешународниот универзитет, за кој се смета дека е сопственост на рамиз Мерко.

Мерко – непартиски градоначалник?

Во меѓувреме, порталот Лидер.мк, повикувајќи се на извори во партијата, напиша дека во наредните денови се очекува средба на претседателот на партијата Али Ахмети со американскиот амбасадор или заменик амбасадор во Скопје. По тој состанок Ахмети ќе одлучи дали ќе бара оставка од Мерко од функцијата градоначалник и нови избори во Струга или не.

Според изворите од ДУИ, ако Ахмети побара оставка од Мерко, а овој одбие, постои можност и официјално да биде исклучен од партијата.

„Во тој случај Мерко може да го продолжи мандатот како непартиски градоначалник“, велат извори од ДУИ, појаснувајќи дека немаат правен механизам да го принудат Мерко да поднесе оставка, доколку не го направи тоа доброволно.

Македонија заслужува фунцкционери со интегритет.

Ахмети можел да го дознае ставот на американската амбасадорка Анџела Агелер, во врска со прогласувањето за непожелна личност за САД на струшкиот градоначалник Рамиз Мерко и од нејзината изјава објавена вчера на Фејсбук. Таа рече дека „народот на Македонија заслужува интегритет од своите јавни функционери и систем којшто ќе ги смета за одговорни“.

САД ќе продолжи да повикуваат секого – без разлика на позицијата или политичката партија – којшто ќе го поткопува владеењето на правото, загрозувајќи го напредокот и стабилност на Македонија“ – напиша Агелер на Фејсбук страницата на Амбасадата на САД.

Шлаканица од САД за владата на СДСМ и ДУИ

За ВМРО-ДПМНЕ одлуката на Стејт департметнот е „шамар за владата на СДС и ДУИ“, а тоа е уште една причина да се најдат во опозиција.

„Стејт Депрартментот јасно потврди дека високите претставници кои се дел од владата на СДС и ДУИ се криминалци. САД нотира дека владините функционери се мешаат во судската власт и диктираат пресуди. САД нотира дека во Македонија нема независно и професионално судство, туку политичко влијание од страна на високи функционери дел од криминалната коалиција СДС и ДУИ“ – заклучува ВМРО-ДПМНЕ во своето соопштение.

Таравари: Сам да си поднесе оставка, веднаш

Лидерот на Алијанса за Албанците, Арбен Таравари синоќа побара од градоначалникот на општина Струга, Рамиз Мерко да си поднесе оставка од функцијата, откако беше ставен од американскиот Стејт Департмент на црната листа на САД.

– Јас да бев на местото на Рамиз Мерко, вечерва веднаш би дал оставка и ќе оставам друго лице да раководи со општината. Мора да се расчисти со ова. Од друга страна правосудните органи не реагираат и причина за тоа е што власта има инсталирано свои луѓе во правосудните органи. ДУИ 20 години владее со тие институции со свои луѓе. Ние како политичка партија секогаш сме гласни кога станува збор за корупцијата, рече Таравари во емисијата „Клик плус“.

Вистинска казна за Мерко е да му забранат пристап во Мала Речица

Веста за Мерко на црната лсита на САД ја коментираа нашироко јавни личности од сите провиниенции. Аналитичарот Џевдет Хајредини ја коментираше на нему својствен, ироничен начин.

„За Мерко битно е да не добие забрана за влез во Мала Речица“, напиша на Фејсбук Хајредини.

Лидерот на Левица Димитар Апасиев напиша на Фејсбук: „Се моли Калето (американската амбасада) да не ги дискриминира јавно градоначаниците Албанци“.

Аналитичарот Сашо Клековски, кој е член на Изврчниот одбор на ВМРО-ДПМНЕ вели дека ова е голема осуда и дека сега зависи од македонските институции што понатаму ќе преземат.

– Црните листи се само патоказ. Ова е чекор во добра насока, а што ќе се случува понатаму зависи од нас. претпоставувам дека САД чим ставила одредено лице на црната листа има доволно докази, бидејќи ова е прилично голема осуда и сега прашање е дали нашите органи и институции ќе бидат поттикнати нешто да направат или не – нагласи тој.

Темата „Рамиз Мерко на црната листа на САД“ е една од најкоментираните и најсподелуваните на социјалните мрежи Фејсбук и Твитер.

 

САД смета дека Мерко е корумпиран, замисли како фино би било кога и Македонија би сметала дека е корумпиран.

— Руи (@riste_g) June 20, 2023

Да ви каже чичо, Мендух Тачи едно 20 години е на црна листа на јуесендеј. Живее ко цар. Така да, не припаѓајте одма у несвест за мерко, смањите доживљај

— Цветко (@SkHornet) June 20, 2023