РУСИЈА НЕ ОТСТАПУВА НИТУ ОД ПОЗИЦИИТЕ, НИТУ ОД ЦЕЛИТЕ Кремљ не очекува напредок во мировните преговори со Украина
Нема основа за надеж во некакво чудо, но ние ќе ги браниме нашите интереси, ќе се заложиме за нивно остварување и ќе продолжиме да ги исполнуваме задачите што си ги поставивме од самиот почеток, вели портпаролот на рускиот претседател Владимир Путин, Дмитриј Песков.
Кремљ не очекува значителен напредок во мировните преговори со Украина што треба да се одржат утре во Турција, соопшти портпаролот на рускиот претседател Владимир Путин, Дмитриј Песков.
Русија, како што наведе, останува на своите позиции и нема да отстапи од првично поставените цели.
– Нема основа за надеж во некакво чудо, но ние ќе ги браниме нашите интереси, ќе се заложиме за нивно остварување и ќе продолжиме да ги исполнуваме задачите што си ги поставивме од самиот почеток – изјави Песков.
Тој додаде дека темата на преговорите меѓу Русија и Украина е „доста сложена“ и дека ќе се разговара и за нацрт-меморандумите што двете страни ги разменија при последната рунда разговори.
Последната рунда мировни преговори меѓу Русија и Украина се одржа на почетокот од јуни во Истанбул, но без конкретен резултат. Новата рунда, според најавите, ќе започне в среда, 23 јули, повторно во Турција.