Роналдињо изрази поддршка до македонската фудбалска репрезентација, Мијатовиќ ќе навива за нас

Славниот 41-годишен фудбалер Роналдињо вели дека со големо внимание ќе го следи претстојниот континентален собир и денеска преку социјалните мрежи ја испрати поддршката за нашата фудбалска репрезентација на Европското првенство. Ова видео е споделено на Инстаграм профилот на македонскиот репрезентативец Елиф Елмас.

Практично, од сите страни доаѓа поддршката за најдобрите македонски фудбалери пред настапот на Европското првенство кое за нас ќе започне в недела. Избраниците на селекторот Игор Ангеловски се подготвуваат во Букурешт за првиот натпревар од групата „Ц“ против Австрија.

Легендата на црногорскиот и југословенскиот фудбал Предраг Мијатовиќ изјави за српските медиуми дека негови омилени репрезентации на ЕУРО2020 ќе бидат македонската и хрватската.

– Не би рекол дека ќе бидам нечиј навивач, но би сакал Хрватска да го повтори успехот од последното Светско првенство кога беа вицешампиони, а секако со целото свое срце ќе бидам за Македонија, чиј селектор Игор Ангеловски е мој пријател. Исклучително ми е мило што успеа со својот тим да дојде до историски успех – изјави Мијатовиќ за белградскиот весник „Блиц“.

Поранешниот фудбалер на Реал Мадрид, со кој во 1998 година ја освои Лигата на шампиони, како главен фаворит за титулата на ЕУРО2020 ја посочи Франција, а во потесниот круг кандидати ги вброи Португалија, Германија, Шпанија и Италија.