Револуционерно откритие на израелските научници: Пациентите кои прележале ковид-19 имаат имунитет и без антитела

Научниците од Израел тврдат дека серолошките тестови не се сигурни и дека и покрај тоа што антителата исчезнуваат, сепак останува некаков долгорочен имунитет во организмот.

Ваквото експертско мислење било доставено до Министерството за здравство на Израел и преку него се препорачува да не се користат серолошите тестови за ковид-19 со цел да се утврди дали некој човек стекнал имунитет, бидејќи, како што е наведено во документот, оваа „алатка“ не е доволно сигурна за некој да добие „пасош за имунитет“ и за да може да патува, објави „IsraelNationalNews“.

Тел Брош, началник на Инфективната единица во болницата „Асута“ во Израел, го доставил документот до Министерството за здравство, предупредувајќи дека според последните информации, серолошките тестови не се најсигурни и веродостојни во однос на утврдување на заштита од инфекција ниту по закрепнувањето од вирусот, ниту по вакцинирањето против ковид-19.

„Освен за медицински истражувања, не се препорачува да се користат серолошките тестови за следење на оние кои примиле вакцина против коронавирусот“, наведено е во документот.

Експертите неодамна направиле истражување кое покажало дека иако антителата генерално исчезнуваат во рок од 4 до 8 месеци, сепак човечкото тело во повеќе случаи останува имуно на реинфекција, а тоа, според нив, значи дека нивото на антитела не предвидува дали едно лице е имуно на нови инфекции и до кој степен е тоа така.

Брош ги обвинува и компаниите кои вршат серолошки тестови дека всушност тие ја измамиле јавноста.

– Брзањето да се направи серолошки тест за да се утврди дали некој има антитела или дали се вакцинирани е целосно неоправдано и не треба да се прави – рече Брош.