ПУТИН МУ ВЕТИ НА ПЕЗЕШКИЈАН, РУСИЈА ОСТАНУВА СО ИРАН Двете земји нема да ги прекинат економските и трговските врски
Рускиот и иранскиот претседател се сретнаа во Бишкек на маргините на самитот на ШОС, каде разговарале за војната, санкциите и продлабочувањето на билатералната соработка.
Рускиот претседател Владимир Путин денеска порача дека Москва останува солидарна со иранскиот народ во заштитата на неговите интереси, за време на средбата со иранскиот претседател Масуд Пезешкијан во киргистанската престолнина Бишкек.
Средбата се одржа на маргините на самитот на Шангајската организација за соработка (ШОС), а според достапните информации, станува збор за прва средба на двајцата лидери од почетокот на војната на Блискиот Исток.
Путин на средбата истакна дека Русија и Иран ќе продолжат да ги развиваат своите економски и трговски односи, и покрај актуелната воена и политичка ситуација.
– Русија е солидарна со иранскиот народ во заштитата на неговите интереси – порача Путин, нагласувајќи ја поддршката на Москва за Техеран во актуелните околности.
Пезешкијан, од своја страна, ѝ се заблагодари на Москва за нејзиниот став во однос на војната и санкциите поврзани со конфликтот.
Иранскиот претседател оцени дека Техеран и Москва можат заеднички да се спротивстават на, како што го нарече, „едностраниот“ пристап во надворешната политика на Соединетите Американски Држави.
Во фокусот на разговорите биле и билатералните односи меѓу двете земји. Според иранското претседателство, Путин и Пезешкијан разговарале за начините за дополнително зајакнување и проширување на соработката во различни области.
Средбата во Бишкек доаѓа во период на зголемени тензии на Блискиот Исток, што дополнително ја нагласува важноста на односите меѓу Москва и Техеран.